सिन्धुली जिल्लालाई मुख्य आधार क्षेत्र मानी प्रकाशन भईरहेको साझा नेपाल साप्ताहिकले प्रकाशनको चौधौं वर्ष पुरा गरि १५ औं वर्षमा प्रवेश गरेको छ । लोकतन्त्रको खम्बाका रुपमा मोफसलबाट प्रकाशन भएको यो साप्ताहिकले १५ औं वर्षसम्म आईपुग्दा निक्कै बाधा व्यवधान र चुनौती पार गरेको छ ।
पछिल्लो समय लोपोन्मुख सञ्चार संस्थाका रुपमा साप्ताहिक पत्रपत्रिकाहरु परिरहेका छन । प्रविधिको विकाससँगै छापामाध्यमहरु संकटमा छन । त्यसमा पनि साप्ताहिक पत्रपत्रिका झनै संकटमा छन । लोकतन्त्र, राजनीतिक, सामाजिक, आर्थिक मुद्दालाई स्थापित गर्न नेपालका छापामाध्यमहरुले उल्लेखनीय भूमिका खेलेका छन । त्यसमा पनि साप्ताहिक पत्रपत्रिकाको झनै उल्लेख्य योगदान रहेको छ । त्यहि मध्येको निरन्तर प्रकाशन भईरहेको साप्ताहिक पत्रिका हो साझा नेपाल । समाचार, विचार, साहित्य, कला, मानवअधिकार, लोकतन्त्र, सूचनाको हक स्थापना, शिक्षा, स्वास्थ्य, खेलकुद, विकास लगाएतका विविध विषयलाई प्राथमिकतामा राखेर प्रकाशन भईरहेको यो साप्ताहिक नितान्त महिलाको टिमले सञ्चालन गरेको सञ्चार गृह हो ।
महिलाहरु सञ्चारसंस्था चलाउन सक्दैनन भन्ने मान्यतालाई चिर्दै निरन्तर प्रकाशनमा रहेको यो पत्रिकाले सञ्चार क्षेत्रका मुल्य मान्यता, आचारसंहिता लगाएतका विषयलाई प्राथमिकता दिँदै अगाडि बढेको छ ।
डिजिटल युगको माग, छिटो छरितो सञ्चार प्रवाहलाई मध्येनजर गरि अनलाईन संस्करण www.esajhanepal.com समेत सशक्त प्रकाशन गरिरहेको यो पत्रिकालाई समयानुकुल प्रकाशन, सञ्चालन, परिमार्जन गर्नका लागि हाम्रा शुभचिन्तक, पाठक, विज्ञापनदाता, सहकर्मीहरु र अग्रज अनुजको सल्लाह सुझाव मायाले सम्भव भएको छ । पत्रिकाको निरन्तरता र गुणस्तरीयता कायम गर्न पाएका सबै सुझाव, मार्गदर्शन, सहयोग, सद्भावका लागि सबै सबैप्रति कृतज्ञ छौं, सबैलाई धन्यवाद ।
आगामी दिनमा पनि जिम्मेवार सञ्चारसंस्थाको भूमिकामा रहिरहनेछौं । लोकतन्त्रलाई बलियो बनाउन र समाज परिवर्तनको संवाहक बन्न निक्कै ठूलो जिम्मेवारी र चुनौती छन । ती चुनौतीलाई सामना गर्न हरपल साथमा रहने पत्रिका र अनलाईनको टिम धन्यवादको हकदार छन । विज्ञापनदाता र पाठक पत्रिकाका खम्बा हुन जो विना हाम्रो प्रकाशनको अर्थ छैन । १५ औं प्रकाशन वर्ष प्रवेशको अवसरमा सबैलाई हार्दिक धन्यवाद सहित शुभकामना व्यक्त गर्दछौं ।
बिमला पाण्डे
प्रकाशक
