सिन्धुली । नेकपा एमालेले शनिबार जिल्लाका छ वटा स्थानीय तहका केन्द्रहरुमा सरसफाई गरेको छ । पार्टीको बार्षिक कार्ययोजना तथा दुधौलीमा सम्पन्न चौथो पूर्ण बैठकको निर्णय अनुसार स्थानीय तहका केन्द्रमा सरसफाई तथा कोणसभा गरिएको नेकपा एमाले सिन्धुलीका अध्यक्ष महेन्द्रदेव श्रेष्ठले बताएका छन ।
पालिका कमिटीहरुको आयोजनामा सरसफाई कार्यक्रमको आयोजना गरिएको श्रेष्ठले बताए । उनका अनुसार घ्याङलेख गाउँपालिकाको केन्द्र हायुटार, सुनकोशी गाउँपालिकाको केन्द्र रामटार, गोलञ्जोर गाउँपालिकाको केन्द्र ग्वालटार, फिक्कल गाउँपालिकाको केन्द्र सोखुबेशी, तिनपाटन गाउँपालिकाको केन्द्र लाम्पानटार, दुधौली नगरपालिकाको केन्द्र दुधौलीमा सरसफाई गरिएको हो ।
फिक्कलमा केन्द्रीय सदस्य गणेश पहाडीको नेतृत्व तथा पालिका कमिटी अध्यक्ष रामप्रसाद भण्डारीको संयोजनमा, तिनपाटनमा प्रदेश कमिटी सदस्य प्रलाद पोखरेलको नेतृत्व र पालिका कमिटी अध्यक्ष वुद्धिमान तामाङको संयोजनमा कार्यक्रम सम्पन्न भएको छ ।
यस्तै दुधौलीमा प्रदेश कमिटी सदस्य प्रदीप कटुवालको नेतृत्व र पालिका कमिटी अध्यक्ष खेटराज अधिकारीको संयोजनमा सरसफाई तथा सभा गरिएको अध्यक्ष श्रेष्ठले जानकारी दिएका छन ।
घ्याङलेख गाउँपालिकामा एमालेका बागमति प्रदेश सदस्य भरत पोखरेलको नेतृत्व तथा पालिका अध्यक्ष कृष्ण थिङको संयोजनमा, सुनकोशीमा प्रदेश कमिटी सदस्य कौशल कोइरालाको नेतृत्व तथा पालिका अध्यक्ष गोरखबहादुर खड्काको संयोजनमा कार्यक्रम गरिएको छ ।
गोलञ्जोरमा प्रदेश कमिटी सदस्य निर्मल रम्तेलको नेतृत्व तथा पालिका कमिटी अध्यक्ष पूर्ण थापाको संयोजनमा कार्यक्रम गरिएको छ ।
पूर्व निर्धारित कार्यक्रम अनुसार मरिण गाउँपालिका र हरिहरपुरगढी गाउँपालिकामा कार्यक्रम हुन सकेको छैन । दुई पालिकामा माघे संक्रान्तिपछि कार्यक्रम गर्ने जानकारी प्राप्त भएको श्रेष्ठले बताए ।
यस्तै कमलामाई नगर कमिटीले कमलामाई मन्दिरमा आइतबार सरसफाई गर्ने भएको छ । माघे संक्रान्ति मेलालाई लक्षित गरि मन्दिर सरसफाई गर्ने कार्यक्रम तय गरेको छ ।
