मानवअधिकार आयोगको सहजीकरणपछि उठ्यो शुशिलाको शव
सिन्धुली । पुस ६ गते आफ्नै घरका परिवारका सदस्यले पेट्रोल छर्केर आगो लगाई हत्या गरिएकी कमलामाई नगरपालिका वडा नं. ४ धुराफाँटकी शुशिला बम्जनको शव तेह्रौं दिनमा शुक्रबार उठेको छ । सासु मायाँरानी बम्जन, नन्द मिना लामा र ससुरा दुर्गामान बम्जनले उनको जिउँदै आगो लगाई हत्या गरेका थिए ।
तेह्रौं दिनमा उनको शव माइती र घर परिवारले संयुक्त रुपमा बुझेका हुन् । शव बुझेपछि परिवारले हरिहरपुरगढी गाउँपालिका वडा नं. ४ द्वारखोलामा तामाङ संस्कार अनुसार शुशिलाको अन्त्येष्टि गरेका छन् ।
माईती परिवारको तर्फबाट मृतकका दाजु भिम बहादुर घिसिङ, भाउजु निर्मला स्याङतान, भाई प्रेम बहादुर घिसिङ र मृतकका देवर वृख बहादुर बम्जनले शव बुझेको जिल्ला प्रहरी कार्यालय सिन्धुलीका एसपी लालध्वज सुवेदीले बताएका छन् ।
मृतकका ७ वर्षका तीन जना छोराछोरीको पठन पाठन र भरणपोषणका विषयमा माईती पक्ष र घर पक्षबीच सहमति भएपछि शुशिलाको शव उठेको हो । शुशिलाका ७ वर्षका दुई छोरा र १ छोरी रहेका छन् । नावालकहरुको पठनपाठन र संरक्षणका सवालमा माइती र घर पक्षबीच सहमति जुटेपछि शव बुझाईएको एसपी सुवेदीले बताएका छन् ।
शव बुझ्नु अघि जिल्ला प्रशासनमा भएको छलफलमा मृतक शुशिलाका छोराछोरीले अध्ययन गर्ने विद्यालय न्यु स्टार बोर्डिङ स्कुलको होस्टलमा पूर्ण आवासिय रुपमा राख्ने र १५ महिनाको भरणपोषण र पठनपाठनको रकम मृतकका देवर वृख बहादुर बम्जनले खर्च बेहोर्ने सहमति भएको छ ।
यस्तै माईती पक्षले बालबालिकालाई जुनसुकै समयमा भेट्न पाउने, रेखदेख गर्न दिने गरि सहमति जुटेको हो । जिल्ला प्रशासन कार्यालय सिन्धुलीमा प्रमुख जिल्ला अधिकारी स्किम श्रेष्ठ, जिल्ला प्रहरी कार्यालय सिन्धुलीका एसपी लालध्वज सुवेदी, कमलामाई नगरपालिका वडा नं. ४ का वडा अध्यक्ष महेन्द्र प्रसाद ढकाल सहितको सहभागिता तथा वडाअध्यक्ष ढकालको रोहवरमा घर र माईती पक्षबीच सहमति भएको हो ।
शुक्रबार भएको सहमतिमा नावालकहरुको नाममा सहमति भएको मितिले ६ महिना भित्र नावालक बच्चाहरुको संयुक्त रुपमा बैंक खाता खोली उनीहरुको बाबु सुर्य बहादुर बम्जनको अंशबाट कट्टा हुने गरि ४० लाख बैंक दाखिला गरिदिने सहमति भएको छ । बाँकी रहेको सम्पत्तिमा सुर्य बहादुर बम्जनको तर्फबाट अंशमा नावालकहरुको हक अधिकार यथावत रहने सहमति भएको छ ।
माईती पक्षबाट मृतकका भाई प्रेम बहादुर घिसिङ र घर पक्षबाट देवर वृख बहादुर बम्जनले सहमतिमा हस्ताक्षर गरेका छन् । रोहवरमा दाजु भिम बहादुर स्याङतान, भाउजु निर्मला स्याङतान, स्थानीय पदम बहादुर अस्थानी मगर, कनपा ५ का उषा स्याङतान, कनपा ६ का रामकाजी वाईवा रहेका छन् ।
प्रशासनले तेह्रौ दिनसम्म शव बुझाउन नसकेपछि राष्ट्रिय मानवअधिकार आयोग बागमती प्रदेशको टोलीले शव बुझाउन र सहमति जुटाउन सहजीकरण गरेको थियो । आयोगको सहजीकरणपछि परिवारले शव बुझ्न सहमत भएका थिए ।
सहमति जुट्नु अघि आयोगको टोलीले प्रमुख जिल्ला अधिकारी स्किम श्रेष्ठ, जिल्ला प्रहरी कार्यालय सिन्धुलीका प्रमुख एसपी लालध्वज सुवेदी, मृतकका माईती र घरतर्फका परिवार, कमलामाई नगरपालिका वडा नं. ४ का अध्यक्ष महेन्द्रप्रसाद ढकाल, मानवअधिकारकर्मीहरु, पत्रकारहरुलाई समेत भेट गरेको थियो भने घटनास्थलको अध्ययन समेत गरेको थियो । आयोगका मानव अधिकार अधिकृत कृष्ण मिश्र सहितको टोली सिन्धुलीमा आएको थियो ।
