सिन्धुली । नेपाल पूर्व प्रहरी संगठन सिन्धुलीले संगठनको ३५ औं स्थापना दिवस मनाएको छ । दिवसका अवसरमा आईतबार सिन्धुलीमाढीमा भएको कार्यक्रममा पूर्व प्रहरी स्मारिका विमोचन समेत गरिएको छ । प्रमुख अतिथि सुबेदी र र विशिष्ट अतिथि हायुले स्मारिका बिमोचन गरेका थिए ।
नेपाल पूर्व प्रहरी संगठन सिन्धुलीका अध्यक्ष हिरालाल श्रेष्ठको अध्यक्षता, जिल्ला प्रहरी कार्यालय सिन्धुलीका प्रहरी उपरिक्षक लालध्वज सुवेदीको प्रमुख आतिथ्यता, तथा पूर्व प्रहरी निरिक्षक राम बहादुर हायुको विशिष्ट आतिथ्यतामा भएको कार्यक्रममा संगठनका दुई जना सहयोगदाताहरुलाई सम्मान समेत गरिएको छ ।
पूर्व प्रहरी संगठनका प्रहरी नायव उपरिक्षक रघु लामा र सिन्धुलीका सफल व्यवसायी दीपक अधिकारीलाई सम्मानपत्र सहित दोसल्ला ओढाएर सम्मान गरिएको हो । साथै सो अवसरमा आश्रित परिवार खादा लगाई सम्मान गरिएको छ ।
कार्यक्रममा बोल्दै प्रमुख अतिथि सुवेदीले समाजमा रहेका विकृति, विसङ्गतिहरुको विरुद्ध आवाज उठाउन र संगठनमा रहँदा सिकेको, भोगेको अनुभवहरु सामाजिक जीवनमा कार्यान्वयन गर्न संगठनको भुमिका महत्वपूर्ण रहेको बताए । उनले संगठन बाहिर रहेका पूर्व प्रहरी कर्मचारीलाई समावेश गर्न सके संगठन बलियो र मजबुत हुने विश्वास व्यक्त गरे ।
कार्यक्रममा बोल्दै संगठनका अध्यक्ष हिरालाल श्रेष्ठले पूर्व प्रहरीहरुलाई हेरचाह गर्ने मान्छे नभएको खण्डमा पूर्व प्रहरी संगठनले हेरचाह गर्ने बताए । उनले अहिलेको समयमा छोरा बुहारी सबै बिदेशतिर जाने भएकाले कोहि बिचल्ली भएर बसेका पूर्व प्रहरीहरुलाई संगठनले सहयोग गर्ने बताएका हुन ।
कार्यक्रममा विभिन्न सांस्कृतिक कार्यक्रमहरु समेत राखिएको थियो । कार्यक्रममा सहभागि विद्यार्थीहरुलाई प्रमाणपत्र समेत वितरण गरिएको थियो । कार्यक्रममा नेपाल पत्रकार महासंघका पूर्व केन्द्रीय सदस्य द्वारिका काफ्ले, सामुदायिक वन उपभोक्ता महासंघ सिन्धुलीका अध्यक्ष हितलाल श्रेष्ठ, कमला टोल विकास संस्थाका अध्यक्ष लगाएतले शुभकामना व्यक्त गरेका थिए ।
