सिन्धुली । जिल्लामा सवारी दुर्घटना बढ्दै गएको पाईएको छ । पछिल्लो तीन वर्षको तथ्यांक हेर्दा जिल्लामा दुर्घटनासँगै मानवीय क्षति पनि बढ्दै गएको पाईएको हो । जिल्ला ट्राफिक प्रहरी कार्यालय सिन्धुलीका अनुसार विगतका तीन आर्थिक वर्षमा ५ सय ३८ वटा सवारी दुर्घटना भएका छन । ती दुर्घटनामा परि ९१ जनाले ज्यान गुमाएका छन भने एक हजार दुई सय छपन्न जना घाईते भएका छन ।
जिल्लामा आर्थिक वर्ष ०७९/८० मा १ सय ५८ सवारी दुर्घटना भएका छन । आर्थिक वर्ष ०८०/८१ मा १ सय ७५ र आर्थिक वर्ष ०८१/८२ मा २ सय ५ सवारी साधन दुर्घटना भएको जिल्ला ट्राफिक प्रहरी कार्यालय सिन्धुलीको तथ्यांक छ ।
यस्तै ती दुर्घटनामा परि आर्थिक वर्ष ०७९/८० मा ३६ जना, आर्थिक वर्ष ०८०/८१ मा २५ जना र आर्थिक वर्ष ०८१/८२ मा ३० जनाको ज्यान गएको छ । आर्थिक वर्ष ०७९/८० मा ३ सय ३९ जना, आर्थिक वर्ष ०८०/८१ मा ३ सय ९६ जना र आर्थिक वर्ष ०८१/८२ मा ५ सय २१ जना दुर्घटनामा परि घाईते भएका छन ।
दुर्घटना र मानवीय क्षति बढ्दै जाँदा प्रहरीले सवारी कारवाहि भने घटाएको छ । जसका कारण विगतका वर्षहरुको तुलनामा राजस्व संकलन कम भएको छ ।
घट्दै ट्राफिक कारवाहि र राजस्व
जिल्लामा ट्राफिक कारवाहि र राजस्व संकलन लगातार घट्दै छ । तीनवटा राष्ट्रिय राजमार्ग र भित्री सडक सञ्जालले जोडिएको जिल्लामा अहिले लगातार सवारी कारवाहिको दर घटिरहेको छ । सवारी कारवाहि घट्दै जाँदा राज्यलाई प्राप्त हुने राजस्व समेत घटिरहेको जिल्ला ट्राफिक प्रहरी कार्यालय सिन्धुलीका प्रमुख मोहम्मद कलिम अन्जुमले बताएका छन ।
उनका अनुसार आर्थिक वर्ष ०७९/८० मा ३७ हजार, आर्थिक वर्ष ०८०/८१ मा ४४ हजार ५ सय र आर्थिक वर्ष ०८१/८२ मा २६ हजार ९ सय ११ सवारी साधन कारवाहिमा परेका छन । सवारी कारवाहिमा अघिल्लो वर्षको तुलनामा गत वर्ष १७ हजार ५८९ कमी आएको देखिन्छ ।
राजस्व संकलन भने तीन वर्षमा क्रमश घट्दै गएको पाईन्छ । आर्थिक वर्ष ०७९/८० मा तीन करोड ६९ लाख ८२ हजार राजस्व संकलन भयो । आर्थिक वर्ष ०८०/८१ मा २ करोड ६ लाख २० हजार राजस्व संकलन गरेको ट्राफिक प्रहरीले आर्थिक वर्ष ०८१/८२ मा १ करोड १९ लाख ९९ हजार १६ रुपैंया मात्र राजस्व संकलन गरेको कलिम अन्जुमले बताएका छन । उनका अनुसार राजस्व कम हुनुको अर्को कारण अनलाईन भुक्तानी पनि रहेको छ । तथापी प्रहरीले सचेतना जगाउने र कारवाहि कम गर्ने अभियानमा रहेकाले राजस्व कम हुँदै गएको उनले बताए ।
उनका अनुसार पछिल्लो बर्ष ट्राफिक प्रहरी दुर्घटना घटाउने र कारवाहि पनि घटाउने अभियानमा रहेको छ । जसका लागि सडक सचेतना कार्यक्रमलाई प्रभावकारी बनाउन अभियान नै चलाएको छ । आर्थिक वर्ष २०८१/८२ मा प्रहरीले २ हजार ३ सय सचेतनाका कार्यक्रम गरिसकेको छ । जसबाट १ लाख ६३ हजार १ सय ७६ जना लाभान्वित भएका छन ।
जुन कामको निरन्तरता चालु आर्थिक वर्षमा पनि छ । ट्राफिक प्रहरी र प्रहरीका जिल्लाभरका युनिटबाट ट्राफिक सचेतना र सडक सचेतनाका कार्यक्रमहरु चलाईएको छ । नागरिक, चालक सहचालक, विद्यार्थीहरु, विद्यालय वस चालक, सहचालकहरुलाई सचेतना दिईएको अञ्जुमले बताए ।
