सिन्धुली । बागमती प्रदेशका नव नियुक्त वन तथा वातावरणमन्त्री भरत बहादुर के.सीले सामुदायिक वन समुदायको आयआर्जनसँग जोडिनुपर्ने बताएका छन । नेकपा एमाले सिन्धुलीले आयोजना गरेको स्वागत तथा बधाई ज्ञापन कार्यक्रममा बोल्दै उनले बागमती प्रदेशका १९ सय सामुदायिक वनहरुको कार्ययोजना पुनर्लेखन गरि सामुदायिक वनका सदस्यहरुलाई आयआर्जनमा जोडिने बताए ।
हरियो वन नेपालको धन भन्ने नारालाई अव हरियो वन जनताको धन र समृद्धिको आधारका रुपमा अगाडि बढाउनुपर्नेमा केसीले जोड दिए ।
कार्यक्रममा बोल्दै के.सीले नेपालमा सामुदायिक वन धेरै बनाइएको तर त्यसको व्यवस्थापन गर्न नसकेको बताए । ‘दिगो वन व्यवस्थापन गर्न शुसासन कायम गर्दै वनलाई उद्यममा जोड्ने र जनतासँग जोड्ने र आम्दानीसँग जोड्ने काम गर्न आवश्यक छ, त्यसैले हामीले सामुदायिक वनका कार्ययोजना पुनर्लेखन गर्दैछौं’, उनले भनेका छन ।
दिगो वन व्यवस्थापन हुनका लागि वन जनताको आयआर्जनसँग जोडिनु आवश्यक भएको उनले बताए । ‘सामुदायिक वनले नाँगा डाँडालाई संरक्षण गरि हरियो बनायौं, जोगाएको वनलाई अब जनताको आयआर्जनमा जोड्न आवश्यक छ,’ उनले भने । वन व्यवस्थापनको लागि मन्त्रालयले अध्ययन सुरु भएको मन्त्री केसीले बताएका छन ।
कार्यक्रममा बोल्दै नेकपा एमाले सिन्धुलीका अध्यक्ष महेन्द्रदेव श्रेष्ठले जिल्लाको समृद्धिको आधारको पहिलो श्रोत वन रहेको बताउँदै वनलाई व्यवस्थित बनाउने योजना नभएकाले बताए ।
वनलाई जिल्लाको धन बनाउने कुरामा गतिशिल योजना नभएको अध्यक्ष श्रेष्ठले बताए । प्राकृतिक सम्पत्तिलाई समृद्धिको आधारका रुपमा विकास गर्न र प्रयोग गर्न नसकिएको उनले बताए । अध्यक्ष श्रेष्ठले जिल्लाको वन सम्पदाको व्यवस्थापन र आयआर्जनमा जोड्ने विषयमा नीतिगत जटिलता र योजना नहुँदा व्यवस्थापन हुन नसकेको भन्दै त्यसतर्फ मन्त्रीको ध्यानाकर्षण गराएका छन ।
