सिन्धुली । विद्यालयका बस चालक सहचालकलाई ट्राफिक नियम र लागु औषध दुव्र्यसन विरुद्ध सचेतना कार्यक्रम शनिबार सिन्धुलीमाढीमा सम्पन्न भएको छ ।
राष्ट्रिय नीजि तथा आवासिय विद्यालय एशोसियसन नेपाल (नेशनल प्याव्सन) को आयोजना तथा जिल्ला प्रहरी कार्यालय सिन्धुली र जिल्ला ट्राफिक प्रहरी कार्यालय सिन्धुलीको सहजीकरणमा उक्त कार्यक्रम गरिएको हो ।
नेशनल प्याब्सन सिन्धुलीका अध्यक्ष सोनाम बज्यूको अध्यक्षता र नेशनल प्याब्सनका केन्द्रीय उपाध्यक्ष कृष्णकुमार उप्रेतीको प्रमुख आतिथ्यतामा भएको कार्यक्रममा जिल्ला प्रहरी कार्यालय सिन्धुलीका प्रहरी निरिक्षक राजकुमार खड्का, जिल्ला ट्राफिक कार्यालय सिन्धुलीका प्रमुख प्रहरी निरिक्षक मोहम्मद कलिम अञ्जुम र प्रहरी सहायक निरिक्षक किर्तिमान घलानले सहजीकरण गरेका थिए ।
कार्यक्रममा विद्यालय बस सञ्चालन निर्देशिका, लागु औषध दुव्र्यसन र लागु औषध नियन्त्रण ऐनले गरेका कानुनी व्यवस्था, सवारी चालकले पालना गर्नुपर्ने ट्राफिक नियम लगाएतका विषयमा सहजीकरण गरिएको थियो ।
कार्यक्रममा बोल्दै प्रमुख अतिथि नेशनल प्याब्सनका केन्द्रीय उपाध्यक्ष कृष्णकुमार उप्रेतीले विद्यालय बस चालक र सहचालकहरु चालक मात्र नभई बालबालिकाको जिम्मेवार अभिभावक समेत भएकाले बस चलाउँदा जिम्मेवार भएर काम गर्न आग्रह गरे । विद्यालयका बसहरु बालबालिका मात्र बोक्न समेत सबै विद्यालयहरुलाई आग्रह गरेका छन ।
यस्तै कार्यक्रममा बोल्दै जिल्ला प्रहरी कार्यालय सिन्धुलीका प्रहरी नायव उपरिक्षक सूर्य प्रकाश सुवेदीले विद्यालय वस चालक सहचालक बालबालिकाको भविष्य बोके हिड्ने भएकाले जिम्मेवार भएर सवारी चलाउन आग्रह गरे ।
कार्यक्रममा नेशनल प्याब्सन आवद्ध विद्यालयहरुका बस चालक र सहचालकहरु, विद्यालयका प्रिन्सिपल, व्यवस्थापक, शिक्षक, पत्रकारहरु लगाएतको सहभागिता रहेको थियो । कार्यक्रममा प्रशिक्षक तथा सहजीकरण गर्ने निकायहरु जिल्ला प्रहरी कार्यालय सिन्धुली र जिल्ला ट्राफिक प्रहरी कार्यालय सिन्धुलीलाई सम्मान पत्र समेत प्रदान गरिएको थियोे ।
