सिन्धुली । कमलामाई नगरपालिकाले आगामी आर्थिक वर्षका लागि एक अर्व २९ करोड, ५९ लाख ४० हजार १६० रुपैंया बराबरको बजेट ल्याएको छ । चालु आर्थिक वर्षका लागि गत वर्ष नगरपालिकाले १ अर्व ४५ करोड८९ लाख ५५ हजारको बजेट ल्याएको थियो । मंगलबार नगरपालिकाले १६ औं अधिवेशनको प्रथम बैठकमा नीति तथा कार्यक्रम र बजेट प्रस्तुत गरेको हो ।
बजेट प्रस्तुत गर्दै कमलामाई नगरपालिकाका उपप्रमुख मञ्जु देवकोटाले नगरपालिकाले दिने सेवालाई सहज, सरल र चुस्तदुरुस्त बनाउने खालका योजना ल्याईएको बताएकी छिन । उनले नगरपालिकाले नगरपालिकाको आर्थिक, सामाजिक, भौतिक पूर्वाधार विकास, लैंगिक समानता र सामाजिक समावेशीकरण, दिगो विकास, वातावरणीय संरक्षणलाई लक्षित गरि बजेट विनियोजन गरिएको उल्लेख गरिएको छ ।
यस्तै उद्यमशिलता विकास, गरिवी निवारण, प्रविधिमैत्री सेवा लगाएतका क्षेत्रमा बजेट विनियोजन गरिएको उपप्रमुख देवकोटाले प्रस्तुत गरेको बजेटमा उल्लेख छ । बजेटमा आन्तरिक श्रोत १५ करोड १ लाख ४० हजार, वित्तिय हस्तान्तर संघियतर्फ ७५ करोड ४९ लाख, वित्तिय हस्तान्तरण प्रदेशतर्फ ८ करोड २० लाख २२ हजार प्राप्त हुने अनुमान गरिएको छ । यस्तै संघिय सरकार राजस्व बाँडफाँडबाट १५ करोड २ लाख ७४ हजार ५८३ अनुमान गरिएको छ । यस्तै प्रदेश सरकार राजस्व बाँडफाँड ८ करोड ३४ लाख ६३ हजार ५७७ रुपैंया अनुमान गरिएको छ ।
यसैगरि विज्ञापन कर ५ लाख ४० हजार, वन रोयल्टी १ करोड २५ लाख, ढुंगा गिटी बालुवा २ करोड, मालपोत रजिष्ट्रेशन बाँडफाँडबाट ४ करोड, मेला महोत्सव, मनोरञ्जन करबाट १ लाख, नगद लागत सहभागितामा हुने आम्दानी २० लाख अनुमान गरिएको बजेटमा उल्लेख गरिएको छ ।
नगरपालिकाले नगरस्तरीय महत्वका योजनाहरुलाई ९ करोड नौ लाख बजेट विनियोजन गरिएको छ । नगरपालिकाको सञ्चालन तथा प्रशासनीक खर्च २७ करोड ७२ लाख, प्रदेश समपुरक कार्यक्रमको लागि २ करोड ४० लाख, प्रकोप व्यवस्थापन कोषका लागि ५० लाख, कर्मचारी कल्याण कोषका लागि २० लाख, पूँजीगत अनुसन्धान तथा परामर्शका लागि ३० लाख बजेट विनियोजन भएको छ ।
यस्तै नगरपालिकाले वडाको विकासात्मक कामका लागि प्रत्येक वडामा ९० लाखका दरले बजेट विनियोजन गरेको छ । नगरपालिकाका शाखा, उपशाखा र ईकाईहरुका लागि ७ करोड ६० लाख बजेट विनियोजन भएको छ ।
सभामा नगरप्रमुख उपेन्द्र कुमार पोखरेलले नीति तथा कार्यक्रम प्रस्तुत गरेका थिए । नगरपालिकाले प्रदेशको ज्ञान कमलामाईमा योगदानको नारालाई आत्मसात गर्दै कृषि, रोजगार र व्यवसायमा विदेशबाट फर्केका युवाहरुलाई प्राथमिकतामा राखेको छ ।
नगरपालिकाले पर्यटन प्रवद्र्धनका लागि पर्यटकीय गुरुयोजना निर्माण गरि काम अगाडि बढाउने नीति लिएको छ । यस्तै कृषि, पशुपालन, उद्योग विकास, रोजगार, सेवा प्रवाहमा सुशासन र संस्थागत विकास, महिला सशक्तिकरण, सार्वजनिक सम्पत्ति व्यवस्थापन, मेलमिलाप तथा न्याय निरुपण, सामाजिक सुरक्षा व्यवस्थापन, शिक्षा, स्वास्थ्य, पोषण लगाएतका विषयहरु नीति तथा कार्यक्रममा प्राथमिकतामा परेका छन ।
लैंगिक समानता र सामाजिक समावेशीकरणमा महिला, बालबालिका, अपांगता भएका व्यक्तिहरुलाई प्राथमिकतामा राखिएको छ । यस्तै खेलकुद क्षेत्रमा खेल र खेलाडीको पहिचान स्थापित गर्ने गरि सबै वडामा पुग्ने गरि खेलकुद विकासमा काम गरिने नीति नगरपालिकाको रहेको छ ।
नगरपालिकाले सिन्धुलीगढीको विकासमा उल्लेख्य नीति तथा कार्यक्रम बनाएको छ । सेल्फीडाँडालाई ढुंग्रेभञ्ज्याङ पर्यटकीय स्थल नामाकरण गरि रक क्लाईम्बिङ सञ्चालन अगाढि बढाईने, सिन्धुलीगढीमा हिलस्टेशन बनाउने, सिन्धुलीगढीमा गढी दरवार राणाकालिन प्रशासन झल्किने ऐतिहासिक वस्तुहरुको संग्रहालय निर्माण गर्ने योजना नगरपालिकाको रहेको छ ।
यस्तै कमलामाई नगरपालिकाका ऐतिहासिक, सांस्कृतिक र धार्मिक पर्यटकीय क्षेत्रको विकासमा पनि नगरपालिकाले काम गर्ने गरि नीति बनाएको छ ।
