सिन्धुली । मरिणबाट लागु औषध सहित चारजना पक्राउ परेका छन । मदनभण्डारी राजमार्ग अन्तर्गत मरिण गाउँपालिका वडा नं. ७ देउजोरबाट उनीहरुलाई विहिबार राती पक्राउ गरिएको हो ।
पक्राउ पर्नेमा कमलामाई नगरपालिका वडा नं. २ का २३ वर्षका राम बहादुर डिम्दोङ, २२ वर्षका साजन तामाङ, १८ वर्षको साजन तामाङ र २५ वर्षको दिपक गौतम रहेको प्रहरीले जनाएको छ ।
मोटरसाईकलको सिट मुनी लुकाएर ल्याएको ट्रामाडोल क्याप्सुल १३४ वटा, ट्रामाडोल हाइड्रोक्लोरिड क्याप्सुल १५४ पिस बरामद गरिएको जिल्ला प्रहरी कार्यालय सिन्धुलीका प्रहरी निरिक्षक सुनिल प्रसाद चौरसियाले जानकारी दिए । उनका अनुसार साँझ साढे पाँच बजे सिन्धुलीबाट मरिणतर्फ जाँदै गरेको बाप्र०१–००४क१५६४ नम्बरको बस र महेन्द्रझाडीबाट सिन्धुलीतर्फ आउँदै गरेको प्र.३–०२–००६प३०८७ नम्बरको मोटरसाईकल ठक्कर खाएको खबर प्राप्त भएपछि घटनास्थल पुगेको प्रहरीले चेकजाँचको क्रममा लागु औषध फेला पारेको थियो ।
दुर्घटनामा सामान्य घाइते भएका मोटरसाईलमा सवार साजन तामाङलाई प्राथमिक स्वास्थ्य केन्द्र कपिलाकोटमा पठाएपछि सवारी चेकजाँचका क्रममा लागु औषध फेला परेको थियो ।
मोटरसाईकल चालक राम बहादुर डिम्दोङ सहित शंकास्पद चार जनालाई पक्राउ गरि शुक्रबार जिल्ला अदालत सिन्धुलीबाट म्याद लिई अनुसन्धान सुरु गरिएको चौरसियाले जनाएका छन ।
