सिन्धुली । नेपाल पत्रकार महासंघको मंसिर २८ गते सम्पन्न निर्वाचनमा सिन्धुली जिल्लाले महासंघका जिल्ला बाहिरका शाखा, प्रदेश र केन्द्रमा विभिन्न पदाधिकारी सहित प्रतिनिधित्व गरेको छ । जिल्लाका चार जना महिला र ३ जना पुरुषले जिल्ला बाहिर नेतृत्व लिन सफल भएका हुन् । जिल्लाका चार बुहारी सहित ७ जनाले जिल्ला बाहिर प्रतिनिधित्व गर्ने भएका हुन ।
यसरी प्रतिनिधित्व गर्ने क्रममा पत्रकार महासंघका केन्द्रीय समिति, बागमती प्रदेश समिति, काठमाण्डौं जिल्ला समिति र गोरखापत्र प्रतिष्ठान शाखामा नेतृत्व लिन पुगेका हुन् ।
नेपाल पत्रकार महासंघको केन्द्रीय उपाध्यक्षमा सिन्धुलीको फिक्कलकी नितु पण्डित निर्वाचित भएकी छिन । उनी सञ्चारिका समूह नेपालका पूर्व अध्यक्ष समेत हुन । उनले सिन्धुलीकै छोरी गंगा पौडेल बराललाई पराजित गर्दै निर्वाचित भईन ।
यस्तै केन्द्रीय सदस्यमा गोलञ्जोर तिनकन्याकी देविका घर्ति मगर निर्विरोध निर्वाचित भईन । उनी प्रेस चौतारी नेपालकी केन्द्रीय उपाध्यक्ष समेत हुन ।
यस्तै चुनावी प्रतिस्पर्धाबाट बागमति प्रदेशको उपाध्यक्षमा कमलामाई नगरपालिका ५ की बिमला पाण्डे निर्वाचित भएकी छिन । उनी जिल्लामै बसेर पत्रकारीता गरिरहेकी छिन । यस अघि नेपाल पत्रकार महासंघ सिन्धुलीको उपाध्यक्ष, क्रियाशिल पत्रकार महिला (डब्लुडब्लुजे) सिन्धुलीको संस्थापक अध्यक्ष, प्रेस चौतारी नेपालको पूर्व केन्द्रीय सदस्य हुदै न्युनतम पारिश्रमिक निर्धारण समितिको सदस्य समेत रहेर पत्रकारीता क्षेत्रका विभिन्न ठाउँमा नेतृत्व समेत गरिसकेकी छिन । उनी प्रभात समाचार दैनिककी प्रवन्धक निर्देशक, साझा नेपाल साप्ताहिककी प्रकाशक, सम्पादक र यस अनलाईनकी सञ्चालक समेत हुन ।
यस्तै सिन्धुलीबाट बागमती प्रदेश सदस्यमा सिन्धुलीका बरुण लामिछाने निर्वाचित भएका छन । उनी नेपाल प्रेस युनियनका जिल्ला अध्यक्ष समेत हुन ।
नेपाल पत्रकार महासंघ गोरखापत्र शाखा अध्यक्षमा सिन्धुलीको सुनकोशीका दिपक श्रेष्ठ अध्यक्ष बनेका छन । उनी काठमान्डौमा बसेर गोरखापत्रमा कार्यरत छन ।
यस्तै प्रेस सेन्टरका विक्रम रत्नले नेपाल पत्रकार महासंघको काठमान्डौ शाखाको सहसचिवमा नेतृत्व लिन पुगेका छन । रत्न काठमान्डौमा बसेर पत्रकारीता गरिरहेका छन । यस्तै अनिशा निरौला पनि काठमान्डौ शाखा सदस्यमा निर्वाचित भएकी छिन । उनी प्रेस सेन्टरकी सदस्य हुन ।
