सिन्धुली । सिन्धुलीबाट बिरामी बोकेर गएका दुई एम्बुलेन्स बाढी पहिरोले रोक्दा २ जना विरामीको बाटोमै मृत्यु भयो । तीन दिनदेखि सुनकोशी १ टुप्पिडाँडामा अलपत्र परेका एम्बुलेन्समै मरेका दुई विरामीको शव नत काठमान्डौ लान सकियो नत सिन्धुली नै फर्काउन सकिएको छ ।
सिन्धुलीको सदरमुकामबाट बिरामी लिएर काठमाडौँ हिँडेको एम्बुलेन्स बीच बाटोमै रोकिएपछि दुई जना बिरामीको उपचार अभावमा मृत्यु भएको जिल्ला प्रहरी कार्यालय सिन्धुलीले जनाएको छ ।
कमलामाई नगरपालिका–४ मल्ल गाउँकी १३ वर्षिय टिका कुमारी भुजेल र महोत्तरीको बर्दिबास नगरपालिका–८ घर भएका ४५ वर्षका मानबहादुर सिंजालीको उपचारका लागि काठमाडौँतर्फ लैजाँदै गर्दा बाटो मै मृत्यु भयो । अविरल वर्षा र बाढीका कारण विपी राजमार्ग अवरुद्ध भएपछि उनीहरुको बाटोमै मृत्यु भएको हो । भुजेल दमको विरामी र सिंजाली टिविका विरामी थिए ।
मृत्यु भएकाहरुको शव तीनदिनदेखि एम्बुलेन्समै छ । लाश गन्हाउन थालिसकेको आफन्तहरुले जनाएका छन । बिरामी बोकेर काठमाडौँ हिँडेका बा२१२च७५२३ र ग१च १७०८ नम्बरको एम्बुलेन्स अहिले पनि टुप्पीडाँडामा नै छन । विरामी बोकेर गएका एम्बुलेन्स शव बोकेर बसेका भए पनि सडक सुचारु गर्न सक्ने अवस्था नरहेको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए ।
बाटो सफा गरेर एम्बुलेन्स सिन्धुली फर्काउन र अन्य यात्रुहरुलाई समेत उद्धार गर्न स्थानीय, प्रहरी लगाएत क्रियाशिल रहे पनि कानढुंग्रीमा सडक भासिएपछि झनै समस्या भएको छ ।
