सिन्धुली । जिल्ला सदरमुकाम सिन्धुलीमाढीका बजार क्षेत्रमा बालश्रम र सडक बालबालिकाको पहिचान गर्न अनुगमन सुरु गरिएको छ । कमलामाई नगरपालिका वडा नं. ६ भित्रका बजार क्षेत्रमा रहेका होटल, ग्यारेज, वर्कसप, पसलहरु लगाएत विभिन्न खालका श्रम क्षेत्रमा स्टिकर टाँस्न र तथ्यांक लिन सुरु गरिएको हो । यो सँगै घरेलु श्रमिक बालबालिकाको समेत यो अवसरमा पहिचान गरिने छ ।
वडालाई बालमैत्री घोषणा गर्ने अभियान अन्तर्गत आइतबारदेखि जोखिमपूर्ण क्षेत्रमा काममा बालबालिकालाई लगाउन रोक्न र बालबालिकाको संरक्षणका लागि यो अभियान सुरु गरिएको वडा कार्यालयले जनाएको छ ।
पहिलो चरणमा विभिन्न सन्देशमूलक सूचना भएका स्टिकर टाँस्ने, तथ्यांक संकलन गर्ने र बालबालिकालाई व्यवस्थापन गर्ने गरि अनुगमन सुरु गरिएको हो ।
अनुगमनमा वडा अध्यक्ष उज्जल थापा, वडा सचिव जगदिश विक्रम कार्की, बालबालिका फोकल पर्सन सावित्रा रेग्मी, जनप्रतिनिधिहरु, प्रहरी, नगर प्रहरी, पत्रकार, उद्योग वाणिज्य संघ, बाल सञ्जालका प्रतिनिधिहरु, गैह्र सरकारी संस्थाका प्रतिनिधि, स्थानीय प्रशासन सहितको टिम रहेको छ । वडा भित्र रहेका २ हजार १ सय दुई बढी घरधुरी तथा व्यवसायीक प्रतिष्ठान शैक्षिक संस्थाहरु लगाएतमा स्टिकर टाँस्ने काम भईरहेको छ ।
कनपा ६ राममाढीबाट अनुगमनको काम सुरु गरिएको छ । २०८१ असार भित्रमा वडालाई बालमैत्री घोषणा गर्ने गरि काम गरिएको वडा सचिव जगदिश विक्रम कार्कीले बताएका छन । उनले ५१ वटा सूचक मध्ये ९० प्रतिशत सूचकहरु पुरा गरि सकिएको बताए ।
वडा अध्यक्ष उज्जल थापाले नगरपालिकाको पहिलो बालमैत्री वडा बनाउनका लागि काम भईरहेको बताए । थापाले जोखिमपूर्ण काममा रहेका बालबालिकाको उद्धार र व्यवस्थापनको काम पनि स्टिकर अभियानसँगै गरिने बताएका छन । अनुगमन निरन्तर हुने र व्यवसायको प्रकृति अनुसार स्टिकर टाँसिने उनले बताएका छन । यो अभियान अन्तर्गत विद्यालय आसपासमा धुम्रपान, मध्यपानको विक्री वितरण गर्न नदिने गरि अभियान चलाईएको उनले बताए ।
नेपाल सरकारले २०८७ सालसम्म बालमैत्री स्थानीय शासन कार्यान्वयन गर्ने गरि अभियान सुरु गरेको छ । कनपा ६ सदरमुकामको मुख्य बजार क्षेत्रहरु रहेको वडा हो । वडाले १८ वर्ष मुनीका बालबालिकालाई श्रममा नलगाउन सचेतना समेत दिदैं अनुगमन गरिरहेको छ ।
