सिन्धुली । कमलामाई नगरपालिका सिन्धुलीले आइतबारदेखि औद्योगिक मेला तथा प्रदर्शनी सुरु गरेको छ । मेलाको उद्घाटन आईतबार सिन्धुलीमाढीमा कमलामाई नगरपालिकाका मेयर उपेन्द्र कुमार पोखरेलले गरेका छन ।
स्थानीय उत्पादनलाई प्रोत्साहन तथा बजार व्यवस्थापन गर्नका लागि औद्योगिक प्रदर्शनीको आयोजना गरिएको कमलामाई नगरपालिका सिन्धुलीले जनाएको छ ।
स्थानीय कृषि तथा औद्योगिक उत्पादनहरुलाई प्राथमिकतामा राखिएको छ । स्थानीय उत्पादनलाई प्रवद्र्धन गरौं, उद्यम व्यवसाय गरि रोजगार बनौं भन्ने नाराका साथ गरिएको उक्त मेलामा स्थानीय लघु तथा घरेलु उद्यमीहरुले उत्पादन गरेका सामग्रीहरु प्रदर्शनमा राखिएको छ ।
सिन्धुलीमाढीको लोकतान्त्रिक चौरमा सुरु भएको मेलामा दुधबाट बनेका परिकारहरु, ढाकाका सामानहरु, झोला, फाईवरका सामग्री, स्थानीय उद्यमीले उत्पादन गरेका कृषि सामग्री, रैथाने सामग्रीहरु, पराल तथा मकैको खोस्टाका चकटी, कृषि उत्पादनहरु, कृस्टलका सामग्रीहरु लगाएत उत्पादनहरु प्रदर्शनीमा राखिएको छ ।
प्रदर्शनीमा राखिएका सामग्रीहरु विक्री वितरण समेत गरिएको छ । मेला दुई दिनसम्म चल्ने कमलामामाई नगरपालिका उद्योग तथा व्यवसाय प्रवद्र्धन शाखाले जनाएको छ ।
यसैबीच कमलामाई नगरपालिकाले सञ्चालन गरेको मेलामा कोशेली डेरी उद्योग सिन्धुलीले निःशुल्क मोहि तथा कुल्फी वितरण गरेको छ । बजारमा पाईने पेय पदार्थ भन्दा दहि मोहि सेवन गरौं स्वस्थ रहौं भन्ने नारा सहित डेरी उद्योगले मोहि तथा कुल्फी वितरण गरेको हो ।
मेलामा एकसय लिटर मोहि र ३ सय वटा कुल्फी निःशुल्क वितरण गरिएको डेरीका सञ्चालक नवराज गजुरेलले बताएका छन ।
