सिन्धुली । सिन्धुलीमा विभिन्न कार्यक्रम गरि विश्व दुध दिवस मनाईएको छ । दुध दिवसका अवसरमा सिन्धुली अस्पतालका विरामीलाई दुध वितरण, प्रभातफेरी तथा दुध किसान तथा सरोकारवालासँग अन्तक्र्रिया गरेर शनिबार सिन्धुलीमाढीमा दुध दिवस मनाईएको हो ।
पशु सेवा कार्यालय सिन्धुलीको आयोजना तथा जिल्ला दुग्ध उत्पादक सहकारी संघ सिन्धुली र नेपाल डेरी यशोसियसन सिन्धुलीको सहकार्यमा दुध दिवस मनाईएको हो । दुध दिवसको अन्तक्र्रिया कार्यक्रममा किसानहरुले दुध उत्पादन गर्ने किसानले समयमा भुक्तानी नपाउँदा समस्या भोग्नुपरेको गुनासो गरेका छन ।
उनीहरुले किसानको समस्यामा राज्य जिम्मेवार नबनेको, पशुपालन गर्ने किसानलाई सरकारले विमा रकम भुक्तानी नदिएको, सरकारका अनुदान किसानको पहुँचमा नभएको लगाएतका गुनासो गरेका छन ।
कार्यक्रममा बोल्दै किसान तथा भिमान सहकारी संस्थाका अध्यक्ष देवराज पौडेलले सरकारका निकायहरुको झण्झटिलो प्रक्रियाले किसानले राज्यका सुविधा लिन नसकेको बताएका छन ।
किसान सुमन विक्रम थापाले विचौलियाका कारण किसानहरुले समयमा भुक्तानी नपाउने, उचित मुल्य नपाउने समस्या भोगिरहेको बताए ।
कार्यक्रममा बोल्ने अधिकांश बक्ताले किसानका समस्यामा राज्य जिम्मेवार नभएको बताए भने दुधको बजारमा स्थानीयकरण गर्न सरकारले ध्यान नदिएको गुनासो समेत गरेका छन । केहि बक्ताले किसानलाई उद्यमी बन्न समेत बताएका छन ।
कार्यक्रममा बोल्दै पशु सेवा कार्यालय सिन्धुलीका प्रमुख प्रभात न्यौपानेले किसानका समस्या समाधानमा सहजीकरण गर्न तयार रहेको बताएका छन ।
जिल्ला दुध उत्पादक सहकारी संघका अध्यक्ष नवराज गजुरेलको अध्यक्षता एवम् पशु सेवा कार्यालय सिन्धुलीका प्रमुख प्रभात न्यौपानेको प्रमुख आतिथ्यतामा भएको कार्यक्रममा जिल्ला सहकारी संघका सचिव खडानन्द तिमल्सिना, हेफर इन्टरनेशनलका प्राविधिक डा. नारायण शर्मा, नेपाल डेरी यशोसियसनका अध्यक्ष बलराम अधिकारी लगाएतले मन्तव्य व्यक्त गरेका थिए ।
