सिन्धुली । खानेपानी, सरसफाई तथा स्वच्छता दिगो विकास लक्ष्य हासिल गर्नका लागि तयार गरिएको नगरपालिका स्तरीय खानेपानी, सरसफाइ तथा स्वच्छता योजनालाई कार्यान्वयनमा ल्याउनका लागि कमलामाई नगरपालिकाले आवश्यक कानुनहरु निर्माण कार्य थालनी गरेको छ ।
खानेपानी, सरसफाइ तथा स्वच्छता सम्बन्धि मौलिक हकलाई सुनिश्चित गरि २०८७ सम्ममा कार्यान्वयनमा ल्याउने गरि खानेपानी, सरसफाइ तथा स्वच्छता सम्बन्धि कार्ययोजना बनाई सकेको भए पनि नगरपालिकामा सम्बन्धित कानुनहरु निर्माण हुन सकेका थिएनन ।
शुक्रबार मानव तथा राष्ट्रिय विकास समाज (ह्याण्डस) नेपाल सिन्धुलीको सहजीकरणमा कानुन निर्माणका सवालमा छलफल भएको हो । कमलामाई नगरपालिका, मरिण गाउँपालिका, सुनकोशी गाउँपालिका, दुधौली नगरपालिका र तिनपाटन गाउँपालिकामा खानेपानी, सरसफाइ तथा स्वच्छता सम्बन्धि कार्ययोजना बनेको छ भने कानुन निर्माण हुने चरणमा रहेको छ ।
ह्याण्डस नेपालले लैंगिक रुपान्तरित खानेपानी, सरसफाइ तथा स्वच्छता दिगो विकास परियोजना मार्फत कानुन निर्माणमा सहजीकरण गरिरहेको छ । अन्य पालिकामा कानुन पास हुने चरणमा पुगेको भए पनि कमलामाई नगरपालिकामा कानुन निर्माणमा ढिलाई भएको ह्याण्डस नेपालले जनाएको छ । स्थानीय तहले खानेपानी, सरसफाइ तथा स्वच्छता सम्बन्धि ७ वटा कानुन निर्माण गर्नुपर्ने हुन्छ ।
