सिन्धुली । वागमती प्रदेश सरकारले बाग्मति प्रदेश भित्र छ हजार किलोमिटर सडक निर्माण गर्ने गरि गुरुयोजना तयार गरेको बाग्मति प्रदेश सरकारका भौतिक पूर्वाधार विकास मन्त्री युवराज दुलालले बताएका छन ।
उनले कमलामाई नगरपालिका ९ र १० जोड्ने गरि कमला नदीमा प्रदेश सरकारको लगानीमा निर्माण सम्पन्न भएको पक्कि पुलको बुधबार उद्घाटन गर्दै सडक निर्माणको लागि गुरुयोजना निर्माणको काम सम्पन्न भएको बताएका हुन ।
उनले अवका दिनमा प्रदेश सरकारले सोहि गुरुयोजना अनुसार सडक निर्माणका काम गर्ने बताए । वाग्मती प्रदेश सरकारको लगानीमा कमला नदीमा निर्माण गरिएको पुलको दुलालले उद्घाटन गरेका हुन । पुल २१ करोड ६२ लाख ९१ हजार ४३३ रुपैयाको लागतमा निर्माण भएको हो ।
गुरुयोजना अन्तरगत सिन्धुलीको आजाद मार्गलाई पहिलो प्राथमिकतामा राखी आगामी वर्षबाट काम गर्ने प्रतिवद्धता समेत मन्त्री दुलालले व्यक्त गरे । उद्घाटन गरिएको पुल सोहि मार्गमा पर्छ ।
प्रादेशिक सडक डिभिजन कार्यालय सिन्धुलीसँग सम्झौता भई २०७६ सालबाट निर्माण सुरु भएको पुल ४ वर्षमा पुरा भएको हो । कमलामाई नगरपालिकाको आजाद नगर भिमानदेखि गोलन्जोर गाउँपालिकाको सुलिभञ्ज्याङसम्मको आजाद मार्गमा पर्ने यो पुल निर्माण सम्पन्न भएपछि कमलामाई नगरपालिकाको वडानं. ९, १० र ११ तथा तिनपाटन गाउँपालिकाको वडा नम्वर १, २ र ३ का करिव १५ हजार बासिन्दा प्रत्यक्ष लाभान्वित हुनेछन् । पुल निर्माणको काम सुर्य एण्ड सन्स प्रा.लि धरानले गरेको थियो ।
