सिन्धुली । अस्पतालमा उपचार गरि रिफर भएकी महिलाको मृत्युपछि तोडफोड भएको सिन्धुली अस्पतालको शुक्रबार सरसफाई गरिएको छ । सरसफाई सकिएसँगै अस्पतालको इमर्जेन्सी सेवा सुरु गरिएको छ ।
सरसफाईमा बाग्मति प्रदेशका पूर्व स्वास्थ्यमन्त्री प्रदीपकुमार कटुवाल, कमलामाई नगरपालिकाका मेयर उपेन्द्र पोखरेल, नेकपा एमालेका नेता एवम् कमलामाई नगरपालिकाका मेयरका उपविजेता महेन्द्रदेव श्रेष्ठ, अस्पताल विकास समितिका पूर्व अध्यक्ष प्रलाद पोखरेल, वर्तमान अस्पताल विकास समितिका अध्यक्ष सतिश ढकाल, नेकपा एमाले निकट अनेरास्ववियुका नेता तथा कार्यकर्ताहरु, राजनीतिक दलका नेताहरु, शसस्त्र प्रहरी, स्वास्थ्यका कर्मचारी, नगरपालिकाका सरसफाई कर्मचारी, नागरिक समाज, पत्रकार लगाएतले सरसफाई गरेका छन । अस्पताल क्षेत्रका सिसा, ढुंगा तथा अन्य फोहोरहरु सफा गरेपछि सेवा सुचारु हुने भएको हो ।
सिन्धुली अस्पतालको इमर्जेन्सी वार्ड ओपीडि वार्ड, प्रसुति वार्ड, इन्डोर, साझा औषधि पसल, सामुदायिक आँखा अस्पताल, फोहोर व्यवस्थापन केन्द्र, डिजास्टर स्टोर लगाएतका सबै क्षेत्रको सरसफाई गरिएको छ । नागरिकलाई सहज तरिकाले स्वास्थ्य सेवा दिनका लागि अस्पतालको सरसफाई गरिएको हो । सरसफाईपछि बाग्मति प्रदेशका पूर्व स्वास्थ्य मन्त्री प्रदीप कटुवालले अस्पताललाई सुचारु गरि सेवा प्रवाह गर्न जरुरी रहेको र सबैको सहयोग आवश्यक रहेको बताए । सेवा सुचारु गर्न सहयोग गर्ने सबैलाई धन्यवाद समेत दिएका छन ।
अस्पताल विकास समितिका अध्यक्ष शतिश ढकालले अस्पताल सार्वजनिक सम्पत्ति भएकाले रक्षा गर्ने जिम्मेवारी राज्य र नागरिकको रहेको बताए । उनले अस्पतालमा भएको क्षती भवितव्य भएको समेत बताए ।
नागरिकलाई सेवा प्रवाह गर्नका लागि स्वास्थ्यकर्मीको मनोवल बढाईदिन समेत सबैसँग ढकालले अपिल समेत गरेका छन । ‘हामीले स्वास्थ्यकर्मीहरुलाई सेवा फर्कन प्रेरित गरिरहेका छौं, उहाँहरुको काम गर्ने मनोवल निकै घटेको छ, असुरक्षित महसुस गर्नुभएको छ । मनोवल बढाउन सबैले सहयोग गर्नुस ।’ उनले सरसफाई कार्यक्रमपछि सम्बोधन गर्दै अनुरोध समेत गरेका छन ।
उनले अस्पताल तोडफोड गर्ने काम मृतकको परिवारबाट नभएको र अराजक भिडले गरेको भएकाले कारवाहि हुनुपर्नेमा समेत जोड दिएका छन ।
ढकालका अनुसार अस्पतालको आपतकालिन सेवा आजैदेखि सुरु गर्न स्वास्थ्यकर्मीहरु तयार छन । आइतबारदेखि अस्पतालका सबै सेवाहरु सुचारु हुनेछन । उनले स्वास्थ्यकर्मीहरुले सुरक्षाको माग भने गरेका छन ।
अस्पताल विकास समितिका पूर्व अध्यक्ष प्रलाद पोखरेलले अस्पताल जन्म र मृत्यु दुवै हुने ठाउँ हो भन्ने कुरा बुझाउन आवश्यक रहेको बताए । कमलामाई नगरपालिकाका मेयर उपेन्द्र पोखरेलले बाँच्नका लागि आउने ठाउँमा जुन अपराधिक घटना भएको छ त्यो निन्दनिय रहेको बताए ।
उनले अस्पताल तोडफोडमा संलग्न व्यक्तिलाई आतकबादीको संज्ञा दिएका छन । उनले त्यस्ता व्यक्तिलाई पहिचान गरि कारवाहिको दायरामा ल्याउन आवश्यक रहेको बताए ।
छानविन समितिको काम सुरु
अस्पतालमा भएको घटनाको सत्यतथ्य छानविनका लागि गठित समितिले शुक्रबारदेखि नै काम सुरु गरिसकेको छ । समितिले ल्याएको प्रतिवेदनका आधारमा घटनाको निचोड निकालिने अस्पताल विकास समितिका अध्यक्ष ढकालले बताएका छन । पीडित परिवारको माग अनुसार छानविन समिति गठन गरिएको थियो ।
ढकालले समितिले छिट्टै छानविनको प्रतिवेदन दिने बताए । सर्वदलिय, सर्वपक्षिय बैठकले जेठ १० गते नै छानविन समिति गठन गरेको थियो ।
