सिन्धुली । सिन्धुली अस्पतालमा भएको घटनाको विषयलाई लिएर विहिबार सिन्धुलीमाढीमा सर्वदलिय सर्वपक्षिय बैठक बसेको छ । बैठकले अस्पताल तोडफोड गर्ने, स्वास्थ्यकर्मीमाथि दुव्र्यवहार गर्ने, सामाजिक सञ्जालमा घटनालाई अतिरंजित गर्दै स्वास्थ्यकर्मीको चरित्रहत्या गर्ने जस्ता क्रियाकलापका सन्दर्भमा जिल्ला प्रहरी कार्यालय अनुसन्धान गरि प्रचलित कानुन बमोजिम कारवाहि गर्ने निर्णय गरेको छ । बैठकले राजनीतिक दल विशेषका कोहि नेता, कार्यकर्ता तोडफोड कार्यमा संलग्न भएको भए सम्बन्धित दलले दलको तर्फबाट समेत कारवाहि गर्ने निर्णय गरेको छ ।
यस्तै अस्पतालको इमर्जेन्सी वार्डलाई आवश्यक सरसफाई र मर्मत सुधार गरि इमेर्जेन्सी अवस्थाका विरामीलाई सेवा पु¥याउन यथासिघ्र सञ्चालन गर्ने र अविलम्ब मर्मत सम्भार आरम्भ गरि विरामी भर्ना र ओपिडी लगाएतका सेवाहरु सञ्चालन गर्ने निर्णय बैठकले गरेको छ ।
सातवटा बुँदामा भएको निर्णयमा अस्पतालको सरसफाई गर्न राजनीतिक दल, नागरिक समाजबाट अस्पताल र सुरक्षाकर्मीको समन्वयमा स्वयमसेवक परिचालन गर्ने, अस्पतालमा हुन सक्ने अराजक गतिविधिलाई निरुत्साहित गर्न र समस्याको दिर्घकालिन समाधान गर्न राजनीतिक दल एवम् नागरिक समाजले आवश्यक पहल गर्ने, घटनाका बारेमा भएका सूचना जानकारी सम्बन्धित सबैले प्रहरीलाई उपलब्ध गराउँदै आवश्यक सहयोग गर्ने लगाएतका निर्णय गरिएको छ ।
प्रमुख जिल्ला अधिकारी सुनिता नेपालको अध्यक्षतामा भएको बैठकले सुत्केरी हुन नसकि मृत्यु भएकी गंगाकुमारी श्रेष्ठप्रति श्रद्धाञ्जली अर्पण गर्दै परिवारजनमा समवेदना समेत व्यक्त गरेको छ ।
अस्पतालका लागि भवितव्य नै भयो : अस्पताल अध्यक्ष
सिन्धुली अस्पतालमा जेठ ९ र १० गते भएको घटनालाई अस्पतालले भवितव्यका रुपमा लिएको छ । अस्पतालले नसोंचेको घटना घटेकाले सुरक्षामा समेत कमजोरी भएको निश्कर्ष निकालेको छ । अस्पताल विकास समितिका अध्यक्ष सतिश ढकालले अस्पतालमा मृतकका परिवार भन्दा पनि घुसपैठको आन्दोलनले क्षती पुगेको बताए ।
प्रहरी प्रशासनको पनि आँकलनभन्दा माथि उठेर घटना भएको प्रति अस्पतालले दुःख व्यक्त गरेको छ । पत्रकार सम्मेलन गर्दै अस्पतालले घटनालाई भवितव्यका रुपमा व्याख्या गरेको हो ।
अस्पतालमा उपचारका गरि रिफर गरिएको विरामीको मृत्यु भएपछि भएको घटनाले आफुहरुलाई दुःखी बनाएको र नियमित कामकाजमा पुग्न समय लाग्ने भएको ढकालले बताएका छन ।
अस्पतालले घटनाक्रमलाई जानकारी दिए पनि डाक्टरका विषयमा अस्पतालले केहि पनि बोलको छैन । अस्पतालका मेडिकल सुपरिटेन्डेन डा.उमेश प्रधानले छानविन समिति बनिसकेको र प्रदेश सचिव सहितको टोली सिन्धुली अनुगमन आउन थालेकोले छानविनको निश्कर्ष कुर्न सबैलाई आग्रह गरेका छन ।
‘छानविनमा जे देखिन्छ त्यसैलाई कुरौं,’ उनले पत्रकारसँग भनेका छन । प्रसुति रोग विशेषज्ञले गरेको उपचारमा आफुले बोल्न नमिल्ने पनि उनले बताएका छन ।
अस्पताल छिट्टै सञ्चालन हुन्छ : डा. प्रधान
अस्पतालको इमर्जेन्सी सेवा बन्द गर्न नमिल्ने भए पनि बसेर उपचार गर्ने ठाउँ समेत नभएकाले समस्या भएको अस्पतालले जनाएको छ । डा. प्रधानले जताततै सिसै सिसा भएका कारण पनि कर्मचारीलाई सरसफाई नगरि काम गर्न प्रेसर गर्न नसकेको बताए ।
डा. प्रधानका अनुसार प्रहरी मुजुल्का उठाउन बाँकी रहेको र प्रशासनले पनि मुजुल्का नउठाउन्जेल सरसफाई नगर्न भनेकाले अहिलेसम्म सेवा सञ्चालन नभएको उनले बताएका छन । सरसफाई र मर्मत सम्भार पछि छिट्टै इमर्जेन्सी सेवा सञ्चालन हुने बताए । अन्तरंग विभागमा आपतकालिन विरामी आए उपचार गर्ने गरि सेवा दिने व्यवस्था मिलाएको उनले बताए । उनका अनुसार घटनापछि अस्पतालमा विरामी आउन सकेका छैनन ।
राजनीतिक दलद्धारा दुःख व्यक्त
सिन्धुलीमा क्रियाशिल तीन राजनीतिक दलले संयुक्त विज्ञप्ती जारी गरि अस्पतालमा भएको घटनाप्रति दुःख व्यक्त गरेका छन । उनीहरुले तोडफोडमा संलग्न व्यक्तिलाई पहिचान गरि कारवाहि गर्न प्रशासनसँग माग गरेका छन ।
नेकपा एमालेका सचिव नारायण बराल, नेपाली कांग्रेसका सभापति उपेन्द्र पोखरेल र नेकपा माओवादी केन्द्रका सचिव ज्वाला प्रसाद न्यौपानेले हस्ताक्षर गरेको प्रेस विज्ञप्तीमा अस्पतालको पुनःनिर्माण गरि सेवा सुचारु गर्न अनुरोध गरिएको छ ।
साथै दलहरुले स्वास्थ्यकर्मीलाई नियमित कामकाजमा फर्कन र अति आवश्यक स्वास्थ्य सेवा सुचारु गर्न अनुरोध गरेका छन ।
अस्पताल सञ्चालन गर्न बजेट माग
अस्पतालमा भएको क्षतीको विवरण सहित सिन्धुली अस्पतालले बाग्मति प्रदेश सरकारसँग बजेटको माग गरेको छ । अस्पतालको सेवा सुचारु गर्न आवश्यक वजेट विनियोजन गर्न मन्त्रालयलाई पत्राचार गरेको हो । अस्पतालले तत्काल सेवा सञ्चालन गर्न आवश्यक बजेट व्यवस्थापन गरिदिन माग गरेको हो । अस्पतालले ५० थान आल्मुनियम झ्याल, १० वटा आल्मुनियम ढोका, ३ थान होर्डिङ बोर्ड, १ थान फ्रिज, १ थान सवारी साधन, १ थान इ हाजिरी मेसिन, तातोपानी, चिसो पानी मेसिन ५ थान र ट्रेचर ट्रली २ थान खरिदका लागि बजेटको माग गरेको हो ।
