सिन्धुली । जिल्लामा आत्महत्याको ग्राफ बढ्दै गएको छ । विशेष गरि आत्महत्याको ग्राफले मानसिक स्वास्थ्य र सामाजिक सुरक्षाको अवस्थाबारे गम्भीर प्रश्न उठाएको छ ।
जिल्ला प्रहरी कार्यालय सिन्धुलीको तथ्यांक अनुसार विगत तीन वर्षमा लगातार आत्महत्याको दरमा वृद्धि भएको छ । जिल्लामा विशेषगरि झुण्डिएर र विष सेवन गरेर आत्महत्या गर्नेको संख्या दुवैको ग्राफ बढेको देखिएको हो ।
तीन वर्षमा जिल्लामा २ सय ४४ जनाले आत्महत्या गरेका छन् । ती मध्ये झुण्डिएर २ सय ११ जना, विष सेवन गरि ३२ जना र खोलामा हामफाली १ जनाले आत्महत्या गरेका छन् ।
प्रतिशतमा हेर्दा सबैभन्दा बढी अर्थात ८६ दशमलब ५ प्रतिशतले झुण्डिएर आत्महत्या गरेको देखिन्छ भने विष सेवनबाट आत्महत्या गर्नेको प्रतिशत १३ दशमलब १ प्रतिशत रहेका छन् ।
यस्तै ० दशमलब ४ प्रतिशतले खोलामा हाम फालेर आत्महत्या गरेको देखिएको छ । तीन वर्षको अवधिमा १ वटा घटना मात्र आत्महत्या दुरुत्साहन गरेको उजुरी परेको छ ।
तथ्यांक अनुसार आर्थिक वर्ष २०८०/८१ मा झुण्डिएर मृत्युका ६९ घटना दर्ता भएका थिए । आर्थिक वर्ष २०८१/८२ मा ६५ जनाले आत्महत्या गरेका थिए भने आर्थिक वर्ष २०८२/८३ मा बढेर ७८ जनाले आत्महत्या गरेका छन् ।
जिल्ला प्रहरी कार्यालय सिन्धुलीका प्रमुख एसपी रविन्द्र बहादुर सिंहका अनुसार आर्थिक वर्ष २०८०/८१ मा ११ जनाले विष सेवन गरि ज्यान गुमाएका थिए भने आर्थिक वर्ष २०८१/८२ मा १२ र २०८२/८३ मा ९ जनाले विष सेवन गरि ज्यान गुमाएका छन् ।
आत्महत्याको दर बर्षेनी बढ्नु चिन्ताको विषय भएको सिंहले बताएका छन् । आत्महत्या गर्नेहरुमा प्रायः मानसिक स्वास्थ्य, पारिवारिक सम्बन्ध, आर्थिक अवस्था तथा रोजगारी लगाएतका समस्याहरु देखिएको छ ।
मानसिक तनाव, घरेलु हिंसा, पारिवारिक विवाद, वैदेशिक रोजगारीबाट सिर्जित समस्या, आर्थिक अभाव, प्रेम सम्बन्धमा आएको असफलता, सामाजिक दबाब तथा दीर्घरोगजस्ता कारणले मानिसलाई आत्महत्या गरेको देखिएको उनले बताए ।
