सिन्धुली । जिल्लामा कोभिडका विरामी बढेसँगै जिल्लाका अधिकांश स्थानीय तहहरुले आफ्नै पालिकामा कोभिडका विरामी उपचारका लागि आइसोलेसन बनाउन सुरु गरेका छन । उनीहरुले पालिकाकै लगानीमा बनाएका धेरै आइसोलेसनहरु सञ्चालनमा समेत आइसकेका छन भने कतिपय सञ्चालनमा आउने तयारीमा रहेका छन ।
पालिकाहरुले अक्सिजन सहितका आइसोलेसन वेडहरु बनाउन थालेका हुन । जिल्लामा रहेको कोभिड १९ अस्पतालले विरामीको चाप धान्न नसक्ने भएपछि र अक्सिजन दिई उपचार गर्नुपर्ने संक्रमित बढेपछि पालिकाहरुले अक्सिजन सहितका अस्थायी आइसोलेसनहरु बनाउन थालेका हुन ।
जिल्लाका दुधौली नगरपालिका, तिनपाटन गाउँपालिका, फिक्कल गाउँपालिका र मरिण गाउँपालिका, हरिहरपुरगढी गाउँपालिका, गोलञ्जोर गाउँपालिकाले अस्थायी अस्पताल निर्माण गरि २४ सै घण्टा सेवा दिन थालिएको जनाएका छन ।
जिल्लामा रहेका ४ वटा प्राथमिक स्वास्थ्य केन्द्रमा आइसोलेसन सहित एमविएस डाक्टर र स्वास्थ्यकर्मीहरुले सेवा दिने गरि कोभिड आईसोलेसन बनाई चलाईएको छ भने फिक्कल, गोलञ्जोर र हरिहरपुरगढीमा उपलब्ध स्वास्थ्यकर्मीहरुले आइसोलेसन चलाउन थालेका छन ।
गाउँपालिकाले सुनकोशी मावि सोखुवेसीमा १० वेडको आइसोलेसन सञ्चालनमा ल्याएको जनाएको छ । गाउँपालिकाका प्रवक्ता राजु वरालका अनुसार गाउँपालिकाको लगानीमा कोभिड १९ अस्पताल सुचारु गरिएको छ । गाउँपालिकामा कोभिडका विरामी बढ्न थालेपछि अक्सिजन सहितको अस्थायी अस्पताल सञ्चालन गरिएको बरालले बताए ।
यस्तै तिनपाटन गाउँपालिकाको प्राथमिक स्वाथ्य केन्द्र लाम्पानटार र वेलघारी प्राथमिक स्वास्थ्य केन्द्रमा पाँच पाँच वेडको अक्सिजन सहितको आइसोलेसन सञ्चालनमा ल्याईएको छ ।
यसैगरि दुधौली नगरपालिकाले सिर्थौली प्राथमिक स्वास्थ्य केन्द्रमा अक्सिजन सहितको आइसोलेसन चलाएको छ । जहाँ २० वेडको आइसोलेसन चलाईएको छ ।
जिल्ला सदरमुकाम समेत रहेको कमलामाई नगरपालिकामा जिल्ला स्तरको ५० वेडको कोभिड अस्पताल अक्सिजन, भेन्टिलेटर सहित चालु अवस्थामा रहेको छ । जहाँ विरामीको उपचार भईरहेको छ भने आपतकालिन अवस्थामा प्रयोग गर्नका लागि एपोलो अस्पताललाई प्रयोग गर्न तयारी अवस्थामा राखिएको छ । जसको व्यवस्थापन कमलामाई नगरपालिकाले गर्ने निर्णय भई तयारी अवस्थामा राखिएको छ ।
गोलञ्जोर गाउँपालिकाले ग्वालटारमा गत वर्ष तयार गरेको कोभिड १९ अस्थायी अस्पताललाई नै प्रयोगमा ल्याएको छ । हरिहरपुरगढी गाउँपालिकाले क्यानेश्वरमा १० वेडको आइसोलेसन तयार भएको गाउँपालिका अध्यक्ष कार्साङ लामाले बताएका छन ।
मरिण गाउँपालिकाले आइसोलेसनको तयारीका लागि स्थान छनौट गरिसकेको छ । मरिण बहुमुखी क्याम्पसमा स्थान छनौट गरिएको र तत्काल क्वारेन्टाईन र आइसोलेसन तयारीको काम गरिने गरि अगाडि बढेको गाउँपालिकाले जनाएको छ ।
मरिण गाउँपालिकाले ५ वेडको आइसोलेन तयार गर्ने भएको हो । सदरमुकाम सिन्धुलीमाडी बाहिर दुधौली र तीनपाटनले आफ्नै प्रयासमा अक्सिजनसहितको आइसोलेसन बेड बनाएका हुन् । सुनकोशी गाउँपालिकाको आत्मीय अस्पतालले २ वेडको आइसोलेसन चलाएको छ । भने घ्याङलेख गाउँपालिकामा ५ वेडको आइसोलेसन चलाईएको छ ।
स्वास्थ्य कार्यालय सिन्धुलीका अनुसार जिल्लामा हालसम्म १०४ वटा आइसोलेसन वेडहरु सञ्चालनमा आएका छन । स्वास्थ्य कार्यालयको तथ्यांकमा फिक्कल गाउँपालिकाको १० वेडको आइसोलेसनको तथ्यांक भने राखिएको छैन ।
