सिन्धुली । सिन्धुलीको कोभिड १९ अस्पतालमा अक्सिजन प्लान्ट निर्माण भएको छ । अस्पतालले कोभिड १९ संक्रमित भएका विरामीहरुलाई सोहि प्लान्टबाट अक्सिजन सप्लाई गरेर उपचार गरिरहेको छ तर जब लाईन जान्छ, कृतिम अक्सिजन लिएर स्वास फेरिरहेका विरामी छटपटिन थाल्छन ।
लाईन गएसँगै उर्जाको बैकल्पिक व्यवस्था नहुदा समस्या परिरहेको कोभिड १९ अस्पतालले जनाएको छ । ‘जब लाईन जान्छ, अक्सिजन पनि जान्छ । कोभिडका विरामी छटपटिन थाल्छन । स्वास्थ्यकर्मीलाई पनि समाल्न हम्मे हम्मे पर्छ,’ कोभिड अस्पतालका इन्चार्ज तथा अमृत कार्की भन्छन् ।
सिन्धुलीको कोभिड अस्पतालमा सिन्धुली सहित तराईका महोत्तरी, सर्लाही, रौतहट देखिका कोभिडका विरामी उपचारका लागि आउने गर्छन् । उनीहरुको अवस्था हेर्दा सबै जसो अक्सिजन दिनुपर्ने विरामी हुन्छन । अस्पतालमा गम्भिर अवस्था भएका विरामीलाई उपचारका लागि राखिने गरेको छ । उनीहरु एकछिन पनि ‘अक्सिजन विना’ टिक्न सक्ने अवस्थामा हुदैनन ।
जब लाईन विग्रन्छ त्यहाँ भएको ३३ केभिको जेनेरेटरले अक्सिजन प्लान्ट धान्न सक्दैन । कार्कीका अनुसार उक्त प्लान्ट धान्नका लागि १०० केभि क्षमताको जेनेरेटर आवश्यक पर्छ । त्यो खरिद गर्न अस्पतालले सकेको छैन भने त्यसका लागि पहल कतैबाट भएको छैन ।
‘यदि लाईन गयो भने विरामी बचाउन सकिने की नसकिने चिन्ता हुन्छ, कहिलकाहिँ त एक मिनेट पनि विरामीको मृत्युका लागि प्रयाप्त समय हुन आउँदो रहेछ’ कार्कीले भने, ‘हामी कहिलेकाहिँ त खान र सुत्न समेत विर्सन थालेका छौं ।’
सिन्धुली अस्पताल विकास समितिका अध्यक्ष प्रलाद पोखरेलका अनुसार ‘लाईन गयो की विरामीको छटपटी र स्वास्थ्यकर्मीको दौडधुप हेरि नसक्नु हुन्छ । यो अवस्थालाई समाधान गर्न सबैको सहयोगको खाँचो छ ।’ उनका अनुसार प्लान नेपालले दिएको जेनेरेटर ३३ केभि क्षमताको मात्र छ । त्यसले अक्सिजन प्लान्ट सञ्चालनका लागि कामै गर्दैन ।
दक्ष जनशक्तिको अभाव
कोभिड अस्पताल थोरै जनशक्तिमा चलिरहेको छ । अक्सिजन प्लान्ट चलाउने त्यहाँका इन्चार्ज तथा रेडियो ग्राफर अमृत कार्की हुन । बायोटेक्निसियन अस्पतालमा छैनन् । प्राविधिक रुपमा कम ज्ञान हुदा हुदै पनि चलाउनुपर्ने बाध्यता छदैंछ । प्राविधिक जनशक्ति नहुदा भेन्टिलेटर चलाउन थप समस्या भएको पोखरेलले बताए । आइसियु चलाउन सामान्य ज्ञान भएका स्वास्थ्यकर्मीबाट निकै समस्या भएको र जागिरका लागि आवेदन माग्दा समेत पदपूर्ति गर्न नसकिएको उनले बताए । भेन्टिलेटर चलाउन नसक्दा विरामी रिफर गर्नुपर्ने अवस्था आइरहेको अस्पतालले जनाएको छ ।
अक्सिजन प्लान्टको क्षमता नै कम
जिल्लामा रहेको अक्सिजन प्लान्टले कोभिडका विरामी धान्न सक्ने अवस्था छैन । यो अक्सिजन प्लान्टको क्षमता प्रति मिनेट ६० लिटर अक्सिजन उत्पादन गर्ने हो । उक्त अक्सिजन प्लान्टले नर्मल वेडमा ४७ वटा वेडलाई अक्सिजन दिन सक्छ । ३ वटा ठूला व्यक्तिको लागि भेन्टिलेटर र १ वटा बच्चाको भेन्टिलेटर चलाउन सक्ने गरि उपकरण उपलब्ध रहेको यो अस्पतालमा १ वटा मात्र भेन्टिलेटर चलाईएको छ । हालको अक्सिजन प्लान्टको क्षमताले एकवटा भेन्टिलेटर चलेमा २० वटा वेडसम्मलाई अक्सिजन दिन सकिन्छ ।
यहाँ २५ वटा एचडियु वेड छन । २० वटा नर्मल वेड छन । नर्मल वेडमा पनि अक्सिजन प्लान्ट र ७ प्यारामिटरको मनिटर जोडिएको छ । तर कोभिडका विरामी बढेसँगै विरामीको चाँप धान्न सक्ने अक्सिजनको क्षमता छैन वा सक्दैन । तराईदेखिको विरामीको चाप धान्न र जिल्लामा संक्रमितको संख्या बढीरहदा चाप धान्न नसकिने र थप व्यवस्थापनको खाँचो भएको पोखरेलले बताए ।
