सिन्धुली । सिन्धुली सदरमुकाम सिन्धुलीमाढीका सबै पसल तथा साना सवारी साधनहरु पूर्ण रुपमा खुलेका छन । प्रमुख जिल्ला अधिकारी योगेन्द्र प्रसाद पाण्डेले प्रहरी सहित सदरमुकाम सिन्धुलीमाढी बजारमा पुगेर सरकारले तोकेको लकडाउन अवधिभर पसल नखुलाउन अनुरोध गरे पनि स्थानीय व्यवसायीहरुले त्यसलाई अटेर गरि पुरै बजार खुलाएका हुन ।
करिब एकसाता देखि विस्तारै पसल खोल्न सुरु गरेका सिन्धुलीमाढी बजार, धुरा बजार, ढुंग्रेवास, माझीटार, रातामाटा लगाएतका सबै बजारहरु पूर्ण रुपमा खुलेका छन । यसअघि उद्योग वाणिज्य संघ सिन्धुलीले नै विपद व्यवस्थापन समितिको पटक पटकका बैठकहरुमा बजार खुल्न पाउनुपर्ने माग राख्दै आएको थियो ।
सिन्धुली उद्योग वाणिज्य संघका अध्यक्ष अमरेश चन्द्र बैदारले व्यवसायीलाई क्षतिपूर्ति दिनु पर्ने र नदिए बजार खुलाउने माग बैठकहरुमा राख्दै आएका थिए । जिल्ला विपद व्यवस्थापन समितिले कोरोना भाइरसको संक्रमणको जोखिम बढ्ने भन्दै बजार खुलाउन आएको उक्त प्रस्तावलाई वेवास्ता गर्दै लकडाउन कडा बनाउनुपर्नेमा जोड दिएको थियो ।
यस्तै जिल्लामा तराईबाट फलफूल लगाएतका सामानहरु आयात हुन थालेका छन । संक्रमण देखिई सकेको सिन्धुलीमा तराईबाट खाद्यान्न, निर्माणका सामान र तरकारीहरु आयात हुन दिने तथा सेनिटाईज गरेर मात्र जिल्ला भित्राउने तथा भण्डारण गर्नुपर्ने भनिए पनि सामाजिक दुरी र स्वास्थ्य सुरक्षामा समेत व्यवसायीहरुले ध्यान दिएका छैनन ।
विना सेनिटाईज सामान आयात भईरहेका छन भने सोमबारदेखि सिन्धुलीका बजारहरुमा मान्छेको भिडभाड बढ्न थालेको छ । जसले कोरोना संक्रमण हुन सक्ने जोखिम बढाएको स्थानीयहरुले गुनासो गर्न थालेका छन । व्यवसायीहरुले पसल खुलाएसँगै तराईका अति संक्रमित जिल्लाहरु जाने र खाद्यान्न तरकारी, निर्माण सामग्रीसँगै नागरिक समेत भित्राउने क्रम बढेको छ ।
यस्तै सिन्धुलीमा बस बाहेकका सबै सवारी साधनहरु निर्वाध चलिरहेका छन । ढुवानीका सामान, मोटरसाईकल, टेम्पो, बोलेरो, टिप्पर लगाएतका सवारी साधानहरु दिनभर निर्वाध चलिरहेका छन ।
