सिन्धुली । कमलामााई नगरपालिका सिन्धुलीले २०७६÷०७७ को लागि एक अर्व ६ करोड ८२ लाख ९० हजार बराबरको बजेट ल्याएको छ । चालु खर्च तर्फ ६३ करोड ३६ लाख ८० हजार र पूँजीगत तर्फ ४३ करोड ४६ लाख १० हजार रुपैंया बराबरको बजेट सार्वजनिक भएको हो ।
मंगलबार कमलामाई नगरपालिकाका मेयर खड्ग खत्रीले उक्त बजेट पाँचौं नगरसभामा प्रस्तुत गरेका हुन । उनले नगरपालिकाले बाँड्न मिल्ने ५७ करोड ४० लाख १० हजार मध्ये ७५.७२ प्रतिशत रकम पूँजीगत तर्फ विनियोजन गरिएको जनाए । उनले जनमुखी प्रशासन, भ्रष्टाचार नियन्त्रण, सुशासन प्रवद्र्धन गुणस्तरीय भौतिक पूर्वाधार विकास, गुणस्तरीय शिक्षा, स्वास्थ्य लगाएत सामाजिक क्षेत्रको विकास तथा कृषिमा आधुनीकिकरण लगाएतका विषयलाई बजेटमा प्राथमिकता दिएको बताए ।
उक्त बजेटमा सिन्धुलीगढीको भौतिक पूर्वाधार विकासका लागि १ करोड, शिक्षामा १ करोड २० लाख, महिला सुरक्षा आवासका लागि १ करोड ५० लाख, लक्षित समुदायका लागि ३० लाख, खेलकुद व्यवस्थापनमा ५० लाख, लैंगिक हिंसा न्युनिकरण परियोजनाका लागि १५ लाख, न्याय सम्पादनमा १० लाख, सूचना तथा सञ्चार प्रविधि सुदृढिकरणका लागि २० लाख, मासुजन्य प्रयोगशाला तथा पशु बधशाला निर्माणमा ३० लाख, बजेट विनियोजन भएको छ ।
यस्तै नगरपालिकाका १४ वडामा भौतिक पूर्वाधार विकासका लागि १४ करोड रकम विनियोजन गरिएको छ । नगरले विद्युतीकरणका लागि नगरवासीको चाहना, उज्यालो नगरपालिका हाम्रो कामना नारालाई यथावत राख्दै १ करोड रकम विनियोजन गरेको छ । यस्तै नगरले नगर जनता आवासको गन्तव्य, खर परालले छाएको छानोको अन्य नारा सहित जस्तापाता उपलब्ध गराउन १ करोड रकमको व्यवस्था गरेको छ ।
स्वास्थ्यमा नगरपालिकाले अलिक बढी बजेट विनियोजन गरेको छ । त्यस्तै सरसफाई र वातावरण संरक्षणलाई पनि बजेटमा प्राथमिकता दिईएको छ । स्वास्थ्यमा सिन्धुली अस्पतालको सुधारका लागि ५० लाख, जनस्वास्थ्य कार्यालय मार्फत दिईने सुविधा र स्वास्थ्य सेवा सृदृढिकरणका लागि ३० लाख, गरिव विपन्न किसान मजदुर लक्षित स्वास्थ्य सुविधा निःशुल्क गर्न ३० लाख बजेट विनियोजन गरिएको छ ।
यस्तै वन र वातावरण क्षेत्र सुधार, विकास र सुदृढीकरणमा २५ लाख विनियोजन भएको छ भने सरसफाई क्षेत्रमा नगरबाट उत्पादन हुने फोहोरमैला व्यवस्थापन तथा ल्याण्डफिल साईडको स्तरोन्नतीमा ५० लाख, फोहर मैला व्यवस्थापनमा मेसिन खरिद २० लाख, विकास निर्माण र सरसफाईमा सहयोग पु¥याउने टोल विकास संस्थालाई १० लाख, ग्वाङखोला सरसफाई र जलाधार संरक्षणमा १० लाख र दिर्घकालिन सरसफाई व्यवस्थापन र वातावरण संरक्षणका लागि वातावरणीय कोष स्थापनाका लागि ५ लाख रकम विनियोजन भएको छ ।
यस्तै यसपालीको बजेटले नगरपालिकाका भित्रका मरिण, कमला, चँदाहा, जिर्गाहाह, ग्वाङखोला, गडौली लगाएतका खोला नियन्त्रणका लागि १ करोड विनियोजन गरिएको छ । यस्तै भिमानमा वसपार्क निर्माणका लागि ९० लाख, यस्तै कनपा ८ र १० मा पिकनिक स्पर्ट निर्माणका लागि ६० लाख, भुसंरक्षण तथा नदी नियन्त्रणका लागि २० लाख, विपत पूर्वतयारी, उद्धार तथा राहतका लागि २५ लाख, शहरी क्षेत्र सृदृढीकरणमा २० लाख बजेट विनियोजन भएको छ । धर्म संस्कृति र मठ मन्दिर गम्वा, भाषा संरक्षण लगाएतका कामका लागि १० लाख बजेट विनियोजन गरिएको छ । यस्तै कमलामाई नगरपालिकाले प्रदेश सरकारसँगको साझेदारीमा कार्यक्रम तथा योजना सञ्चालनका लागि २ करोड २० लाख र संघिय सरकारसँग काम गर्नका लागि ४ करोड बजेट विनियोजन गरेको छ । यसैगरि जेष्ठ नागरिक दिर्घ सेवा सम्मान कार्यक्रमका लागि १२ करोड बजेट विनियोजन गरिएको छ ।
बजेट सँगै नगरपालिकाले नगरसभामा विनियोजन विद्येयक २०७६ पनि पास गरेको छ । विद्येयकमा आगामी वर्षमा नगरपालिकाले ७ करोड ६९ लाख १८ हजार राजस्व संकलनको लक्ष्य प्रक्षेपण गरेको छ । यस्तै नगरपालिकाको आन्तरिक तथा बाह्य आम्दानी गरि एक अर्व ६ करोड ८२ लाख ९० हजार अनुमान गरिएको छ ।
