वलवीर भूजेल
सिन्धुली। रिलिफ नेपाल र वल्र्ड भिजन इन्टरनेसनल नेपालको साझेदारीमा सञ्चालित कृषि तथा आर्थिक बिकास परियोजनाअन्तर्गत फिक्कल गाउँपालिका, तीनपाटन र गोलञ्जोरमा गरी ३३ बोयर जातका बोका वितरण गरिएको छ ।
कार्यक्रम संयोजक आलोक चापागाईंका अनुसार, फिक्कल गाउँपालिकामा २१ वटामध्ये खाङ्गसाङ्गमा नौ वटा, खोलागाउँमा तीन वटा, सोल्पाठानामा तीनवटा, पोखरीमा छ वटा बोका वितरण गरिएको छ ।
त्यस्तै, तिनपाटन गाउँपालिकामा सात वटामध्ये लाम्पान्टारमा तीन, तोश्रामखोलामा दुई र बाहुनतिल्पिङ्गमा दुई वटा बोका किसानलाई बाँडिएको छ । यसैगरी, गोलान्जोर गाउँपालिकाको डुडभन्ज्याङ्गमा पाँच वटा बोका वितरण गरिएको छ ।
सिन्धुलीको ग्रामीण भेगका बाख्रामा नश्ल सुधारगरी किसानको आयआर्जनमा सहयोग पुर्याउने उद्देश्यसहित रिलिफ नेपालले सो बोका वितरण गरेको हो । बाख्रा अनुसन्धान केन्द्र बन्दिपुर तनहुँको स्रोत केन्द्र प्रकाश एग्रो फार्म भानु नगरपालिका ५ बरभन्ज्याङ्गबाट ल्याएर वार्ड अध्यक्षको सहभागितामा बोका वितरण गरिएको जनाइएको छ । १८ किलोदेखि २४ किलोसम्मका ३३ बोका खरिदका लागि १० लाख ८६ हजार ८० रुपियाँ बजेट खर्च भएको जनाइएको छ ।
आधारभूत आवश्यकता पुरा गर्न नसकेका, गरिब, खाद्य असुरक्षा, सम्पतिको अभाव, सामाजिक बहिष्करणमा परेका, अपाङ्गता र कुपोषण, सेवामा पहँुच नभएका र बिद्यालय जानबाट बन्चित, विपदको दृष्टिकोणले जोखिममा रहेका गरीब तथा बिपन्न घर धुरी परिवारलाई बोका वितरण गरिएको रिलिफ नेपालले जनाएको छ । बोका वितरणमा स्थानीय स्तरमा रहेका रिलिफका फिल्ड कर्मचारीहरु सन्तोष बराल, नारायण बि.क., प्रतिमा फुयाल, पार्वती पौडेल, शान्ति बराल, सन्तोष पहाडी, जीवन श्रेष्ठ र रन्जु बानियाँ लगायतको सहयोग रहेको जनाइएको छ ।
