सिन्धुली । सुनकोशी गाउँपालिकाले वडा तहबाट सञ्चालन हुने तीन लाख रुपैयाँसम्मका योजनाको सम्झौता तथा कार्यान्वयन प्रक्रिया वडाबाटै हुने व्यवस्था लागू गरेको छ । यससँगै उपभोक्ता समितिले साना योजनाका फाइल बोकेर गाउँपालिकासम्म धाउनुपर्ने बाध्यताको अन्त्य भएको छ ।
गाउँपालिकाका प्रमुख प्रशासकीय अधिकृतद्वारा गाउँपालिकाका सातै वटा वडालाई जारी गरिएको परिपत्र अनुसार आर्थिक वर्ष २०८३/८४ का लागि गाउँसभाबाट विनियोजित ३ लाख रुपैयाँसम्मका साना योजनालाई छिटो, सहज, पारदर्शी र समयमै कार्यान्वयन गर्ने अधिकार वडा सचिवलाई प्रत्यायोजन गरिएको हो ।
नयाँ व्यवस्था अनुसार वडा अन्तर्गत सञ्चालन हुने योजनाको उपभोक्ता समितिसँग सम्झौता सम्बन्धित वडा कार्यालयबाटै हुनेछ । सम्झौतापछि आवश्यक कागजात वडा कार्यालयले गाउँपालिकाको योजना शाखा, प्रमुख प्रशासकीय अधिकृत र लेखा शाखामा पठाउनेछ । कानुनी प्रक्रिया पूरा भएपछि उपभोक्ता समितिको बैंक खातामा रकम भुक्तानी जम्मा गरिने गाउँपालिकाले जनाएको छ ।
परिपत्रमा उपभोक्ता समितिलाई योजना सञ्चालन सम्बन्धी अभिमुखीकरण गर्ने, आवश्यक कार्यादेश उपलब्ध गराउने, बैंक खाता खोल्न सहजीकरण गर्ने तथा योजना कार्यान्वयनको नियमित अनुगमन वडा र योजना शाखाको समन्वयमा गर्ने व्यवस्था पनि उल्लेख गरिएको छ । योजना सम्पन्न भएपछि आवश्यक कागजात, प्रगति विवरण र अनुगमन प्रतिवेदन तयार गरी वडा सचिव वा वडा प्राविधिकले एकमुष्ट रूपमा भुक्तानीका लागि सिफारिस गर्ने प्रावधान राखिएको छ ।
गाउँपालिकाका अनुसार यस व्यवस्थाले उपभोक्ता समितिको समय, श्रम र आर्थिक खर्च बचत गर्नुका साथै सेवा प्रवाहलाई घरदैलोमै सरल, सहज र प्रभावकारी बनाउने अपेक्षा गरिएको छ । तीन लाखभन्दा माथिका योजनाको सम्झौता भने गाउँपालिकाबाटै हुने व्यवस्था यथावत् रहने जनाइएको छ ।
