सिन्धुली । प्रहरीले शनिबार ठूलो परिणाममा गाँजा बरामद गरेको छ । गाँजा सहित एक जना व्यक्तीलाई समेत प्रहरीले नियन्त्रणमा लिएको छ ।
जिल्लाको हरिहरपुरगढी गाउँपालिका वडा नं. ७ चिसापानीको थोले ब्लोनको गोठबाट प्रहरीले ६ सय १५ किलो गाँजा बरामद गरेको हो ।
गाँजा सहित कटारी नगरपालिका वडा नं. ६ उदयपुर घर भई हरिहरपुरगढी गाउँपालिका ७ चिसापानी बस्ने कुमार पाख्रिनलाई पक्राउ गरेको छ ।
शनिबार राती इलाका प्रहरी कार्यालय कपिलाकोटमा सूचना आएपछि प्रहरी टोली गाँजा भण्डारण गरेको ठाउँमा पुगेको थियो । प्रहरीले गाँजा कुरेर सुतिरहेका पाख्रिनलाई पक्राउ गरि थप अनुसन्धान भईरहेको आइतबार पत्रकार सम्मेलन मार्फत जानकारी दिएको छ ।
गाँजा जिल्लाको उत्पादन हो वा अन्य क्षेत्रबाट ल्याई भण्डारण गरिएको हो भन्ने बारेमा भने नखुलेको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए ।
उनका अनुसार आइतबार नै सिन्धुली जिल्ला अदालतबाट म्याद थप गरि थप अनुसन्धान सुरु गरिएको छ । बरामद गरिएको गाँजा अदालतको आदेश लिएर नष्ट गरिने एसपी काफ्लेले बताए ।
