सिन्धुली । नेकपा एमाले सिन्धुलीको अध्यक्षमा महेन्द्रदेव श्रेष्ठ निर्वाचित भएका छन । चैत २८, २९ र ३० गते सिन्धुलीमाढीमा सम्पन्न आठौं जिल्ला अधिवेशनबाट श्रेष्ठ अध्यक्षमा निर्वाचित भएका हुन ।
चैत ३० गते सिन्धुलीमाढीमा भएको निर्वाचन प्रक्रियाबाट उनी अध्यक्षमा निर्वाचित भएका हुन । श्रेष्ठले निवर्तमान जिल्ला अध्यक्ष समेत रहेका अध्यक्षका प्रत्यासी कुमार बहादुर कार्कीलाई पराजित गरेका हुन । श्रेष्ठले ४४१ मत प्राप्त गरे भने कार्कीले ३०४ मत ल्याएका छन् । शनिबार विहान पदाधिकारीको मतको परिणाम आएको थियो ।
यस्तै उपाध्यक्षमा कर्ण घिसिङ ५३ मतले विजयी भएका छन् । उनले तीन सय ९४ मत प्राप्त गरे भने प्रतिस्पर्धि खड्ग रजन मगर (धिरज)ले तीन सय ४१ मत पाए । घिसिङ निवर्तमान उपाध्यक्ष समेत हुन ।
सचिवमा नवराज थिङ विजयी भएका छन् । थिङ चार सय एक मत सहित विजयी भएका हुन । उनका प्रतिस्पर्धि निवर्तमान सचिव समेत रहेका नारायण बरालले तीन सय २८ मत पाएका छन् ।
उपसचिव (खुला) मा दिपेश बराल निर्वाचित भएका छन् । बराल दुई सय ३५ मत पाएर विजयी हुँदा उनका प्रतिद्वन्द्वी कुमार शर्माले एक सय ५६ मत पाए । यस्तै अर्का राजु बरालले एक सय ५१, टिकाबहादुर देवकोटा ९७ र शंकर कार्कीले ४५ मत पाएका छन् ।
उपसचिव (महिला) मा पार्वती भट्टराई सर्वाधिक चार सय ८४ मत सहित विजयी भएकी छिन् । उनकी प्रतिस्पर्धि मिथुला कुमारी घिमिरेले दुई सय २० मत पाएकी छन् ।
चैत २६ गते सुरू भएको एमाले आठौं अधिवेशनमा तेस्रो दिन शुक्रबार मतदान भएको थियो । कुल सात सय ८३ प्रतिनिधि रहेकोमा सात सय ५४ मत खसेको थियो । शुक्रबार रातीदेखि पदाधिकारीको मतगणना गरिएको थियो भने सदस्यको मत गणना वैशाख २ गते विहानदेखि हुने निर्वाचन कमिटीले जनाएको छ ।
