सिन्धुली । रामेछापको मन्थलीमा बजार अनुगमन थालिएको छ । मंगलबार मन्थली बजारका दैनिक उपभोग्य सामग्री विक्री वितरण गर्ने ३४ वटा खाद्य पसलमा अनुगमन गरिएको हो ।
चाडवाडमा हुन सक्ने कालोबजारी तथा अखाद्य पदार्थमा हुन सक्ने मिसावटलाई मध्येनजर गर्दै जिल्ला स्तरीय अनुगमन समिति रामेछापले बजारको अनुगमन गरेको हो ।
अनुगमनका क्रममा २ हजार ४ सय ६० रुपैंया बराबरको मिति सकिएका खाद्य सामग्री र ७ हजार ८० रुपैंया बराबरको तीन बोरा बाख्राको दाना नष्ट गरिएको खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख पुष्पलाल राईले बताए ।
जिल्ला प्रशासन कार्यालयको नेतृत्वमा गरिएको अनुगमनमा घरेलु तथा साना उद्योग कार्यालय रामेछाप, खाद्य प्रविधि तथा गुण नियन्त्रण डिभिजन कार्यालय सिन्धुली, नेपाल पत्रकार महासंघ रामेछाप, रामेछाप उद्योग वाणिज्य संघ रामेछाप लगाएतका सरोकारवालाहरुको सहभागिता रहेको थियो ।
