सिन्धुली । सडक कालोपत्रे गर्ने विटुमिन (अलकत्रा) को सिन्धुलीमा अभावले भएको छ । जसका कारण राष्ट्रिय गौरवको राजमार्ग मदन भण्डारी राजमार्ग सहित जिल्लाका दर्जनौं सडकको कालोपत्रे रोकिएको छ ।
जसका कारण मदन भण्डारी राजमार्ग, कमलामाई नगरपालिकाका ३ आयोजना, शहरी विकास तथा भवन डिभिजनका ४ वटा योजना, र संसदीय विकास कोष तर्फका ३ वटा सडकहरु पिच हुन सकेका छैनन ।
करीव डेढ महिनादेखि विटुमिन अभाव भएपछि सडक निर्माणको काम अवरुद्ध बनेको छ । यी सबै योजनाहरु गरि करिब एकसय किलोमिटर सडक सिन्धुलीमा कालोपत्रे हुनपर्नेमा काम हुन सकेको छैन ।
यसरी काम अवरुद्ध हुने सडकमा राष्ट्रिय गौरवको आयोजना मदन भण्डारी राजमार्ग, संसदिय विकास कोष तर्फका डकाहा – चकमके सडक, साङ्वाले – वेलटार सडक, खनियाँखर्क–कमारे भञ्ज्याङ सडक, शहरी विकास तथा भवन डिभिजन तर्फका कनपा ५ को पुल्चोक–मधुटार–रानीखोला सडक, पुल्चोक–चिसापानी झोरा सडक, बसपार्क–सिलामे सडक, कनपा ६ को गौमति माविदेखि–गणेशमन्दीरसम्मको सडक लगाएतका सडक रहेका छन ।
यस्तै स्थानीय तह अन्तर्गत लक्ष्मणचोक–पानीट्यांकी सडक, ढुंग्रेवास–मल्लगाउँ सडक लगाएतका सडक कालोपत्रे हुन सकेका छैनन । यी सडकहरुमा निर्माण कम्पनीहरुले सव वेश र वेशको काम सकिसकेका छन । बहु वर्षे तथा चालु आर्थिक वर्षमा निर्माण सक्नुपर्ने अधिकांश योजनाहरुको काम नसकिदा समस्या भएको निर्माण व्यवसायीहरुले गुनासो गर्न थालेका छन ।
डेढ महिना अघिदेखि विटुमिन ल्याउन नसक्दा समस्या भएको र समयमा काम गर्न नसक्ने भन्दै निर्माण व्यवसायी सिन्धुलीले योजनाको म्याद थप गर्न माग गरेको छ । संघका कार्यवाहक अध्यक्ष मनिष ढकाल र महासचिव उद्धव प्रसाद दाहालले विज्ञप्ती जारी गर्दै विटुमिन भारत र तेस्रो मुलुकबाट आउने र २ महिनादेखि नेपाल भित्रन नसक्दा अभाव भएकाले निर्माण व्यवसायीको काबु भन्दा बाहिरको परिस्थितिलाई ध्यान दिन नेपाल सरकार र सार्वजनिक निकायसँग अनुरोध गरेका छन ।
