सिन्धुली । कमलामाई नगरपालिका सिन्धुलीले शुक्रबारदेखि छैठौं मेयर कप तथा उपमेयर कप प्रतियोगिता सिन्धुलीमाढीमा सुरु गरेको छ । कमलामाई नगरपालिका खेलकुद विकास समितिको आयोजनामा खेलकुद प्रतियोगिता सुरु भएको हो ।
प्रतियोगिताको उद्घाटन कमलामाई नगरपालिकाका मेयर उपेन्द्रकुमार पोखरेलले गरेका छन् । उनले खेलाडीलाई भलिबल हस्तान्तरण गरेर खेलको उद्घाटन गरेका हुन् ।
कमलामाई नगरपालिकाले वडा स्तरीय मेयर कप भलिवल र विद्यालयका छात्रा स्तरीय उपमेयर कप प्रतियोगिताको आयोजना गर्दै आएको छ ।
मेयर कप भलिवल प्रतियोगिता अन्तर्गत शुक्रबार ४ वटा खेल भएका छन् । वडा स्तरीय भलिवल प्रतियोगितामा ८ वटा टिमको सहभागिता रहेको थियो । यस्तै उपमेयर कप भलिबल प्रतियोगिता अन्तर्गत पहिलो दिन २ वटा खेल भएका छन् । उपमेयर कपमा १३ टिमले प्रतिस्पर्धामा सहभागि भएको छ ।
शनिबार मेयर कप भलिवल र उपमेयर भलिवलका बाँकी खेलहरु हुनेछन् । यस्तै मेयर कप प्रतियोगितामा कराँते, तेक्वान्दो, फुटबल लगाएतका खेलहरु समेत हुने खेलकुद विकास समितिका अध्यक्ष लोकविक्रम थापाले बताएका छन् ।
