सिन्धुली । विपी राजमार्गसँग जोडिएका दुई मुख्य बजारका होटल तथा रेष्टुरेन्टहरुको स्तरीकरण गरिएको छ । शुक्रबार खाद्य प्रविधि तथा गुण नियन्त्रण डिभिजन कार्यालय सिन्धुलीको नेतृत्वमा सुनकोशी गाउँपालिकाको मुल्कोट तथा गोलन्जोर गाउँपालिकाको खुर्कोटका होटल तथा रेष्टुरेन्टहरुको अनुगमन गरि खाद्य स्वच्छताका आधारमा स्तरीकरण गरि स्टिकर टाँसिएको हो ।
शुक्रबार १५ वटा होटल तथा रेष्टुरेन्टहरुको स्तरीकरण गरि स्टिकर टाँस गरिएको खाद्य प्रविधि तथा गुण नियन्त्रण डिभिजन कार्यालय सिन्धुलीका प्रमुख दिनेश सुवेदीले बताएका छन् ।
स्तरीकरण गरिएका होटलमध्ये खाद्य स्वच्छताको आधारमा १ वटा होटल अतिउत्तम (क) वर्गमा परेको छ । मुलकोटको क्वालिटी बीच रिसोर्ट क वर्गमा परेको हो ।
यस्तै ७ वटा होटल खाद्य स्वच्छताको आधारमा उत्तम (ख) वर्गमा परेका छन् । ५ वटा सन्तोषजनक (ग) वर्गमा र २ वटा सामान्य (घ) वर्गमा परेका छन् ।
क वर्गमा पर्ने होटलमा हरियो रङको तीन तारा भएको (स्टिकर), ख वर्गमा पर्ने होटलहरुमा हरियो रङको दुई तारा भएको (स्टिकर) टाँस गरिएको छ भने ग वर्गको होटलमा एक वटा तारा भएको तथा घ वर्गका होटलमा पहेंलो स्टिकर टाँस गरिएको सुवेदीले बताए ।
स्तरीकरणमा चिन्तन चौतारी होटल एण्ड लाज, खुर्कोट, कार्की होटल एण्ड लज खुर्कोट, पूर्वेली भिजनालय तथा गेस्ट हाउस खुर्कोट, होटल काष्टमण्डप एण्ड गेस्ट हाउस खुर्कोट, श्री कुन्ज होटल खुर्कोट, ताज रिभरसाइड रिसोर्ट मुल्कोट, पौवा बीच रिसोर्ट मुल्कोट ख वर्गमा परेका छन् ।
यस्तै सिस्महल आमा होटल मुल्कोट, होटल युनिक एण्ड फास्ट फूड मुल्कोट, क्वालिटी होटल मुलकोट, द बकेट लिस्ट होटल, होटल रिभर साइड खुर्कोट ग वर्गमा परेका छन् । नमुना होटल एण्ड फास्ट फूड मुल्कोट, चन्द्र एण्ड चमेली भोजनालय मुल्कोट घ वर्गमा परेका छन् ।
अनुगमनका क्रममा होटल रेष्टुरेन्टहरुमा देखिएका कैफियतहरु सुधार गर्न आवश्यक निर्देशन सहित सन्देश मुलक सामग्री समेत वितरण गरिएको थियो ।
अनुगमनमा स्थानीय खाद्य स्वच्छता समूहका सदस्य, होटल व्यवसायी संघ, उद्योग वाणिज्य संघ, स्थानीय पालिका प्रतिनिधि र उपभोक्ता समेतको सहभागिता रहेको थियो ।
कार्यालय प्रमुख सुवेदीले खाद्य स्वच्छताको आधारमा होटल स्तरीकरण तथा लोगो वितरण एक प्रवद्र्धनात्मक कार्यक्रम भएकाले स्तरीकरणमा नपरेका र छुटेका जिल्ला भित्रका अन्य होटल रेस्टुरेन्टहरुले आवश्यक सुधार गरि कार्यालयमा निवेदन दिई स्तरीकरण लोगो लिन सक्ने बताएका छन् ।
