सिन्धुली । नेपाल रेडक्रस सोसाईटी सिन्धुलीको ५४ औं साधारणसभा शनिबार सिन्धुलीमाढीमा सम्पन्न भएको छ । नेपाल रेडक्रस सोसाईटी सिन्धुलीका सभापति अशोक श्रेष्ठको अध्यक्षता एवम् प्रतिनिधिसभा सदस्य लेखनाथ दाहालको प्रमुख आतिथ्यतामा भएको कार्यक्रममा उत्कृष्ट काम गर्ने उपशाखाहरु, उत्कृष्ट कर्मचारीहरुलाई सम्मान गरिएको छ ।
प्रथम उत्कृष्ट उपशाखाको पुरस्कार सुनकोशी उपशाखाले प्राप्त गरेको छ भने सोहि उपशाखाका सभापति मणिराम आचार्यलाई उत्कृष्ट स्वयमसेवकको सम्मान गरिएको छ ।
आर्थिक वर्ष २०८०/०८१ मा उत्कृष्ट कार्य गरेको भन्दै सुनकोशी उपशाखालाई १० हजार नगद सहित सम्मान गरिएको छ । यस्तै कपिलाकोट उपशाखालाई दोस्रो उत्कृष्ट उपशाखाको पुरस्कार प्रदान गरिएको छ । कपिलाकोट उपशाखाले ५ हजार नगद पुरस्कार प्राप्त गरेको छ । यसैगरी तीनवटा उपशाखालाई तेस्रो पुरस्कार प्रदान गरिएको छ । बेलघारी उपशाखा, सिर्थौली उपशाखा र माढी बजार उपशाखालाई ३ हजार नगदसहित तेस्रो पुरस्कार प्रदान गरिएको हो ।
यसैगरी रेडक्रसले उत्कृष्ट कर्मचारीको पुरस्कार एम्बुलेन्स चालक अर्जुन कुमार श्रेष्ठ र यमुना श्रेष्ठलाई प्रदान गरेको छ । उनीहरुलाई तीन हजार रुपैंया, सम्मानपत्र सहित सम्मान गरिएको छ ।
कार्यक्रममा गत असोज १०, ११ र १२ गतेको बाढीका कारण क्षतिग्रस्त रहेका क्षेत्रका उपशाखाहरुलाई सम्मान गरिएको छ । उद्धार, राहत वितरण तथा पुनस्र्थापनामा महत्वपूर्ण योगदान पु¥याएको भन्दै कुशेश्वर दुम्जा उपशाखा, सुनकोशी उपशाखा, पुरानो झाँगाझोली उपशाखा, सितलपाटी उपशाखा, मझुवा उपशाखा र भिमेश्वर उपशाखा, वाशेश्वर उपशाखा, ग्वालटार उपशाखा, डुँडभञ्ज्याङ उपशाखा र महेन्द्रझाडी उपशाखालाई सम्मान गरेको हो ।
यस्तै रक्तसञ्चार केन्द्र सञ्चालन गर्न सुरु गरिएको १ करोड अक्षयकोष स्थापनाको अभियानमा सहयोग गर्ने जिल्लाका ४२ वटै उपशाखालाई उक्त अवसरमा सम्मान गरिएको थियो ।
यस्तै सदस्यता विस्तारमा उत्कृष्ट बनेको माढीबजार उपशाखालाई जिल्ला स्तरीय पुरस्कार प्रदान गरिएको छ भने सोहि उपशाखालाई सबैभन्दा बढी महिला सदस्यता वृद्धि गरेको भनि सम्मान गरेको छ । दुवै पुरस्कारको राशी तीन तीन हजार रहेको छ । कार्यक्रममा रेडक्रसले गरेका गतिविधिको समिक्षा मन्तव्य रेडक्रस सिन्धुलीका सभापति अशोक श्रेष्ठले व्यक्त गरेका थिए ।
कार्यक्रममा प्रगति प्रतिवेदन रेडक्रस सिन्धुलीका मन्त्री लालबहादुर कार्की र आर्थिक प्रतिवेदन कोषाध्यक्ष पुरुषोत्तम प्रसाद अधिकारीले प्रस्तुत गरेका थिए । कार्यक्रममा प्रतिनिधिसभा सदस्य रणकुमारी बलम्पाकी मगर, जिल्ला समन्वय समितिका उपप्रमुख शान्ता कार्की, सुनकोशी गाउँपालिकाका अध्यक्ष दिपा बोहोरा दाहाल, प्रमुख जिल्ला अधिकारी लिलाप्रसाद शर्मा, गोलन्जोर गाउँपालिकाका उपाध्यक्ष ज्वालाप्रसाद न्यौपाने, जिल्ला प्रहरी कार्यालय सिन्धुलीका प्रमुख लालध्वज सुवेदी लगाएत सुरक्षा प्रमुखहरु लगाएतको सहभागिता रहेको थियो ।
