सिन्धुली । नेपाल निजामती कर्मचारी संगठन सिन्धुलीले संगठनको ३५ औं स्थापना दिवस आइतबार सिन्धुलीमाढीमा मनाएको छ । संगठनले स्थापना दिवसका अवसरमा पुराना विरुवालाई गोडमेल तथा मलजल गरेर र नयाँ विरुवा रोपेर स्थापना दिवस मनाएको हो ।
कर्मचारी संगठन सिन्धुलीका अध्यक्ष डिल्ली सौगात घिमिरेले हरेक कार्यक्रममा विरुवा रोप्ने र पछाडी नहेर्ने परिपाटी चलिरहँदा रोपिएका विरुवाको संरक्षण गर्न र अवस्था सुधारका लागि विरुवालाई मलजल गरिएको बताए ।
नेपाल निजामती कर्मचारी संगठन सिन्धुलीका अध्यक्ष डिल्ली सौगात घिमिरेको अध्यक्षता संगठनका केन्द्रीय सदस्य पदम मगरको प्रमुख आतिथ्यता तथा प्रमुख जिल्ला अधिकारी लिलाप्रसाद शर्माको विशेष आतिथ्यता, जिल्लाका विभिन्न कार्यालयका प्रमुखहरु, निजामती कर्मचारी संगठनका बागमती प्रदेशका पदाधिकारी, सदस्यहरु, जिल्ला समितिका पदाधिकारी सदस्यहरु, पत्रकारहरु लगाएतको उपस्थितिमा कार्यक्रम गरिएको हो ।
वृक्षारोपण, गोडमेल तथा मलजलपछि कार्यक्रमलाई सम्बोधन गर्दै नेपाल निजामती कर्मचारी संगठनका केन्द्रीय सदस्य पदम मगरले संघियता कार्यान्वयनको १० वर्षसम्म पनि संघिय निजामती ऐन आउन नसक्दा पीडा बोध भएको बताए ।
यस्तै कार्यक्रममा बोल्दै प्रमुख जिल्ला अधिकारी लिलाप्रसाद शर्माले कार्यालयको काम बाहेक पनि कर्मचारीहरुले रचनात्मक र सामाजिक काममा लाग्नुपर्नेमा जोड दिए । रचनात्मक गतिविधिले सामाजिक क्षेत्रमा पनि कर्मचारीहरुको योगदान देखिने र कर्मचारीहरुको प्रतिष्ठालाई समेत बढाउने शर्माले विश्वास व्यक्त गरे ।
