सिन्धुली । मध्यपहाडी लोकमार्ग अन्तर्गत खुर्कोट–घुर्मी खण्डमा खसेको पहिरो हटाउन सोमबारदेखि नै तिव्र रुपमा काम थालिएको छ । सडकमा दर्जनौ स्थानमा खसेको पहिरो र कोशीले तानेको सडक बनाउन सुरु गरिएको हो । खुर्कोट नजिकै रहेको अक्करेभिरको पहिरो हटाउने काम सोमबारदेखि नै अगाडि बढेको हो । गोलन्जोर गाउँपालिका ६ अक्करे भिरमा करिब ५ सय मिटर सडकमा पहिरो खसेको छ । अक्करे भिरमा जेसीभी, एक्स्काभेटर, र डोजर प्रयोग गरेर पहिरो पन्छाउने काम भइरहेको छ ।
सोमबार दिउँसोदेखि पहिरो पन्छाउने काम सुरु भएकोमा मंगलबार बिहान ४ बजेदेखि नै मेसिन प्रयोग गरेर काम भइरहेको जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले बताए ।
गोलन्जोरमा मात्रै हैबारबेंसी, बलेनी, कुखुरेटार, काली आँप, कुँडुले, मुर्कबेसी तथा फिक्कल गाउँपालिकाको सुम्नामवेशी, नवलपुर, निगुरेखोला, पञ्चकन्या र थोल्मेघाट लगायतका स्थानमा पहिरो खस्दा मध्यपहाडी राजमार्ग पाँच दिनदेखि अवरुद्ध छ । यस्तै फिक्कल गाउँपालिकाको सुम्नामवेशीमा पनि बाटो सफा गर्न सुरु गरिएको छ । मध्यपहाडी राजमार्ग अवरुद्ध हुँदा पूर्वी पहाडका जिल्लाहरु सिन्धुलीको उत्तरी भेग, उदयपुर, ओखलढुङ्गा, सोलुखुम्बु, खोटाङ र भोजपुर लगाएतका जिल्लाबाट राजधानी काठमान्डौ जोडिन सकेका छैनन ।
एसपी काफ्लेका अनुसार विपी राजमार्ग अन्तर्गत काभ्रे र सिन्धुलीको सिमानाको छेउँमा बगाएको विपी राजमार्ग नेपाल प्रहरीको अगुवाईमा जेसीभी, एक्स्काभेटर, र डोजर प्रयोग गरेर निर्माण गर्न थालिएको छ । रोशी र घ्याम्पे खोलालाई डाईभर्सन गरेर सडक सञ्चालन गर्नका लागि काम सुरु गरिएको काफ्लेले बताए ।
अस्थायी बाटो सञ्चालनका लागि खोलाबाट बाहेक डाईभर्सनको विकल्प नभएकाले खोलामा डाईभर्सन बनाउन सुरु गरिएको उनले बताएका छन । विपी राजमार्ग र मध्यपहाडी राजमार्ग अवरुद्ध हुदा पूर्वी तराई र पूर्वी पहाडको काठमान्डौसँग सिधा सम्पर्क टुटेको छ ।
