सिन्धुली । रोशी र सुनकोशी नदीले सुनकोशी र गोलञ्जोरका विभिन्न ठाउँमा वितण्डा मच्चाएको छ । कोशीमा आएको बाढीका कारण दुम्जाका पाँच घर बगाउनुका साथै कुशेश्वर महादेव मन्दिर परिसरमा फसेका ३३ जनाको हालसम्म उद्धार हुन सकेको छैन । प्रहरी चौकी दुम्जाको भवन डुवानमा परेको छ ।
प्रहरी चौकी डुवानमा परेपछि चौकीका सामान सुरक्षित स्थानमा सारिएको छ । दुम्जा र नेपालथोक बीचमा एकसय मिटर विपी राजमार्ग बाढीले बगाएपछि शुक्रबारदेखि नै आवतजावत बन्द भएको छ ।
बाढीले सुनकोशीको मुल्कोट बजार डुवानमा परेको छ । मुल्कोटका क्वालिटी रिसोर्ट, होटल पौवा पूर्ण डुबानमा परेका छन । पशुपति आधारभूत विद्यालय डुबानमा परेको छ । मुल्कोटको घाटे पाटी बगाएको छ । सित्खा बजारको बरपिपल बोट बगाएपछि बजारतर्फ कटान सुरू भएको छ । रोशीखोला दुम्जाका दुई ठूला फाँट नदी कटानमा परेका छन ।
गोलञ्जोर गाउँपालिका वडा नं. ७ खुर्कोट बसपार्क क्षेत्र पूर्ण रुपमा डुवानमा परेको छ । खुर्कोटमा रहेको सशस्त्र प्रहरीको विपद व्यवस्थापन क्याम्प पनि डुवानमा परेपछि क्याम्पका सबै सामान इलाका प्रहरी कार्यालय खुर्कोटमा सारिएको छ । वसपार्क क्षेत्रका स्थानीय बासीलाई सुरक्षित ठाउँमा सारिएको छ ।
मध्यपहाडी राजमार्गको खुर्कोट घुर्मि सडकखण्ड अवरुद्ध भएको छ । कुखुरेटार लगाएत विभिन्न ठाउँमा गएको पहिरोका कारण सडक अवरुद्ध भएको जिल्ला प्रहरी कार्यालय सिन्धुलीका एसपी गोविन्दराज काफ्लेले बताए । यसैबीच सुनकोशी, कमला र बागमती नदीले खतराको तह पार गरेका छन । अविरल वर्षा भईरहेको र बाढी र पहिरोको खतरा रहेकाले नदी तटिय क्षेत्रमा रहेका बासिन्दा र भुगोल कमजोर रहेका क्षेत्रका बासिन्दालाई सुरक्षित रहन एसपी काफ्लेले आग्रह गरेका छन ।
