सिन्धुली । जिल्लामा क्रियाशिल पत्रकारहरुका लागि खोजपत्रकारिता तथा फोटो भिडियो पत्रकारिता सम्बन्धि पाँच दिने तालिम सिन्धुलीमाढीमा सुरु भएको छ ।
पत्रकारहरूको व्यवसायिक क्षमता अभिवृद्धि गर्ने उद्देश्यले सोमबारदेखि तालिम सुरु भएको हो । नेपाल पत्रकार महासंघ सिन्धुलीको आयोजना तथा हरिहरपुरगढी गाउँपालिका सिन्धुलीको सहयोगमा उक्त तालिमको आयोजना गरिएको हो ।
नेपाल पत्रकार महासंघ जिल्ला शाखा सिन्धुलीका अध्यक्ष बाबुराम देवकोटाको अध्यक्षता तथा हरिहरपुरगढी गाउपालिकाका अध्यक्ष बज्रध्वज वाइबाको प्रमुख आतिथ्यतामा तालिमको उद्घाटन गरिएको थियो ।
तालिम जेठ २९ गतेसम्म सञ्चालन हुने आयोजकले जनाएको छ । तालिममा जिल्लाका विभिन्न सञ्चारमाध्यममा कार्यरत २५ पत्रकारहरूको सहभागिता रहेको छ ।
कार्यक्रममा बोल्दै हरिहरपुरगढी गाउँपालिका अध्यक्ष बज्रध्वज वाइबाले क्षमतावान पत्रकार उत्पादन गर्ने आशा व्यक्त गरे । उनले पत्रकारको लागि गर्न सकिने सहयोग आगामी दिनमा पनि रहने बताए ।
यस्तै कार्यक्रममा बोल्दै नेपाल पत्रकार महासंघ बागमती प्रदेशका उपाध्यक्ष बिमला पाण्डेले खोज पत्रकारिता तालिमले पत्रकारहरुको लेखन क्षमता वृद्धि गर्नुका साथै समाचारलाई विश्वसनीय बनाउन मद्दत गर्ने विश्वास व्यक्त गरिन् । उनले खोज पत्रकारितालाई फोटो भिडियोले पुष्टि गर्न र प्रमाण संकलन गर्नुका साथै विश्वनीयता प्रदान गर्ने भएकाले तालिम प्रभावकारी रहने बताईन । पाण्डेले सत्य, तथ्य र प्रमाणमा आधारित पत्रकारिताले सुशासन, पारदर्शिता र जवाफदेहितालाई मजबुत बनाउने बताईन् ।
त्यस्तै नेपाल पत्रकार महासंघ जिल्ला शाखा सिन्धुलीका अध्यक्ष बाबुराम देवकोटाले सञ्चार प्रविधिसँगै पत्रकारिताको स्वरूप पनि परिवर्तन हुँदै गएको उल्लेख बताए ।
तालिममा नेपाल पत्रकार महासंघका पूर्व अध्यक्ष एवम् खोज पत्रकार शिव गाउँलेले खोज पत्रकारिताको विषयमा सहजीकरण गरेका छन् भने फोटो तथा भिडियो पत्रकारिताको तालिम प्रदीप वन्तले सहजीकरण गर्नेछन् ।
