सिन्धुली । सिन्धुली सदरमुकामस्थित पुरानो बजार स्टल बजार अव इतिहासमा मात्र सिमित बनेको छ ३६ वर्ष लामो इतिहास बोकेको स्टल बजार अन्ततः कमलामाई नगरपालिकाले डोजर लगाएर भत्काएको छ । कमलामाई नगरपालिकाले २०७२ सालको भूकम्पपछि जीर्ण बनेको संरचनाले भविष्यमा ठूलो दुर्घटना निम्त्याउन सक्ने भन्दै प्राविधिक सुझावका आधारमा स्टल बजारमा डोजर लगाएर भत्काएको हो ।
जहाँ ४८ वटा सटर थिए । तत्कालिन जिल्ला विकास समितिले उक्त बजार स्थापना गरेको थियो । नीजि, सार्वजनिक साझेदारीमा बनाईएको स्टल बजार अब इतिहास मात्र भएको नेपाल उद्योग वाणिज्य महासंघका पूर्व केन्द्रीय सदस्य अमरेश बैदारले आफ्नो सामाजिक सञ्जालमा लेखेका छन् । संरचना भत्केपछि व्यवसाय गर्दै आएका ४८ जना व्यवसायीहरुले आफ्नो व्यवसाय गर्ने थलोको खोजीमा रहेका छन् ।
नगरपालिकाले वैकल्पिक व्यवस्थापन नगरी संरचना हटाइएको भन्दै असन्तुष्टि र आक्रोश व्यक्त गरेका छन् । व्यवसायीहरु कमलामाई नगरपालिकाको निर्णय विरुद्धमा उच्च अदालत पाटन गएका भए पनि अदालतले अन्तरिम आदेश नदिएपछि सामान सारेका थिए । नगरपालिकाले उच्च अदालतको निर्णय नआएपछि अन्तिम पटक सूचना जारी गरि सामान सार्न समय दिएको थियो । व्यवसायीहरुले सामान सारेपछि नगरपालिकाले ४ वटा डोजर प्रयोग गरि स्टलबजार भत्काएको हो ।
नगरपालिकाका अनुसार भूकम्पपछिको प्राविधिक परीक्षणले भवनलाई जोखिमयुक्त ठहर गरेको थियो । सार्वजनिक सुरक्षालाई ध्यानमा राख्दै र सम्भावित मानवीय क्षति रोक्नका लागि संरचना हटाउने निर्णय गरिएको नगरपालिकाका मेयर उपेन्द्र कुमार पोखरेलले बताएका छन् । नगरपालिकाले नागरिकको सुरक्षाभन्दा ठूलो कुनै विषय हुन नसक्ने बताउँदै जोखिमयुक्त भवनलाई यथावत् राख्न नसकिने स्पष्ट पारेको छ ।
यद्यपि व्यवसायीहरू भने बजार भत्काउने निर्णयको विरोधमा उत्रिएका छन् । उनीहरूले भवन जीर्ण रहेको स्वीकार गरे पनि वैकल्पिक स्थानको व्यवस्था गरेर मात्र संरचना हटाउनुपर्ने बताएका छन् । बजार भत्किएसँगै वर्षौंदेखि सञ्चालनमा रहेका साना तथा मझौला व्यवसाय प्रभावित भएका छन् । धेरै परिवारको आयआर्जनको स्रोत एकाएक बन्द भएको छ ।
स्टलबजार हटाउने विषयमा सिन्धुली उद्योग वाणिज्य संघ, व्यवसायी तथा सरोकारवाला निकायबीच पटक–पटक छलफल भए पनि सहमतिपूर्ण समाधान निस्कन नसकेको व्यवसायीहरुले जनाएका छन् । व्यवसायीहरूले प्रमुख जिल्ला अधिकारीको कार्यालय र कमलामाई नगरपालिकामा ज्ञापनपत्र बुझाउँदै पुनःस्थापनाको माग गरेका थिए ।
यसैबीच सिन्धुली उद्योग वाणिज्य संघका वरिष्ठ उपाध्यक्ष देव नारायण श्रेष्ठले स्टलबजार भत्किनु केवल भौतिक संरचना हट्नु मात्र नभई दशकौंको संघर्ष, सपना र सम्झनाको अन्त्य भएको बताएका छन् । उनले सामाजिक सञ्जाल मार्फत सार्वजनिक गरेको भावनात्मक सन्देशमा स्टल बजार हजारौं सपना र संघर्षको साझा घर भएको उल्लेख गरेका छन् ।
श्रेष्ठले व्यवसायीहरूको भविष्य र जीविकोपार्जनलाई मध्यनजर गर्दै आफूहरूले सम्बन्धित निकायसँग निरन्तर संवाद र पहल गरिरहेको बताएका छन् ।
स्थानीयका अनुसार सार्वजनिक–निजी साझेदारी (पीपीपी) अवधारणामा स्थापना भएको स्टलबजारले सिन्धुलीको व्यापारिक गतिविधि विस्तार गर्न महत्वपूर्ण भूमिका खेलेको थियो । करीब चार दशक समयसम्म जिल्लाको आर्थिक गतिविधिको केन्द्रका रूपमा परिचित बजार हटाइएपछि स्थानीय स्तरमा मिश्रित प्रतिक्रिया देखिएको छ ।
स्टलबजारको भौतिक अस्तित्व समाप्त भए पनि यससँग जोडिएका हजारौं सम्झना, संघर्ष र योगदान भने सिन्धुलीको इतिहासमा लामो समयसम्म जीवित रहने स्थानीयवासीहरूको भनाइ छ ।
