सिन्धुली । निर्वाचन आचारसंहिता र मिडिया सम्बन्धि अन्तक्र्रिया कार्यक्रम बुधबार सिन्धुलीमाढीमा सम्पन्न भएको छ । प्रेस काउन्सिल नेपालको आयोजना तथा नेपाल पत्रकार महासंघ सिन्धुलीको समन्वयमा कार्यक्रमको आयोजना गरिएको हो ।
नेपाल पत्रकार महासंघ सिन्धुलीका अध्यक्ष बाबुराम देवकोटाको अध्यक्षता एवम् प्रमुख जिल्ला अधिकारी स्किम श्रेष्ठको प्रमुख आतिथ्यतामा सम्पन्न अन्तक्र्रियामा बोल्दै प्रेस काउन्सिल नेपालका सदस्य शान्तराम विडारीले पत्रकार र मिडियाहरुले पत्रकार आचारसंहिता र निर्वाचन आचारसंहिता पालना गर्दै मर्यादित पत्रकारिता गर्न आग्रह गरेका छन् ।
उनले निर्वाचन सम्पन्न गर्न अन्य सरोकारवाला जस्तै मिडियाको महत्वपूर्ण भूमिका हुने बताए । उनले मिडिया र पत्रकारलाई जिम्मेवारपूर्वक आचारसंहिता पालना गरि निर्वाचनलाई मर्यादित बनाउन आग्रह गरेका छन् । प्रेस काउन्सिल नेपालका बागमती प्रदेशका मिडिया अनुगमन फोकल पर्सन समेत रहेका विडारीले निर्वाचनको समय विशेष परिवेश भएकाले प्रेस स्वतन्त्रताको मर्यादालाई ख्याल गर्दै उत्तरदायित्व र मर्यादित पत्रकारीता गर्न आग्रह गरेका छन् ।
कार्यक्रममा बोल्दै नेपाल पत्रकार महासंघका महासचिव रामप्रसाद दाहालले निर्वाचनको बेला विशिष्ट अवस्था भएकाले पत्रकार आचारसंहिता र निर्वाचन आचारसंहिता पालना गर्न आग्रह गरेका छन् । निर्वाचनको बेला निर्वाचन आचारसंहिता र पत्रकार आचारसंहिता पत्रकार र मिडिया दुवैलाई लाग्ने भएकाले व्यक्तिगत तथा पार्टीगत प्रचार नगर्न आग्रह गरेका छन् ।
मिडिया हाउसले समेत निर्वाचनका बेला आफ्नो विषयवस्तु मात्र पस्कन समेत आग्रह गरे । उनले निर्वाचनलाई स्वच्छ, मर्यादित र भयरहित बनाउने उद्देश्यले आचारसंहिता बनाईएकाले कार्यान्वयनमा ध्यान दिन आग्रह गरे । उनले निर्वाचनका बेलामा पत्रकार र सञ्चारकर्मीमाथि हुने दवाव र सुरक्षाका बिषयमा राज्य संयन्त्र नै जिम्मेवार हुनुपर्नेमा उनले जोड दिएका छन् ।
कार्यक्रममा बोल्दै नेपाल पत्रकार महासंघ बागमती प्रदेशका उपाध्यक्ष बिमला पाण्डेले सिन्धुलीमा सञ्चारमाध्यम र सञ्चारकर्मीको वर्तमान अवस्थाबारे चर्चा गरेकी छिन् । जिल्लामा पत्रकार आचारसंहिता उलंघनका घटना नभएको बताउँदै पत्रकारहरुलाई सहज रुपमा काम गर्ने वातावरणलाई प्रभावकारी बनाउन आग्रह गरिन् ।
कार्यक्रममा बोल्दै प्रमुख जिल्ला अधिकारी स्किम श्रेष्ठले मत सर्वेक्षणको नाममा उम्मेदवारको हार जितको अनुमान नगर्न समेत आग्रह गरेकी छिन् ।
उनले निर्वाचन आचारसंहिता पालनामा राजनीतिक दल, उम्मेदवार, पत्रकार, मतदाता तथा सम्पूर्ण नागरिकको समान जिम्मेवारी रहने बताउँदै निर्वाचनका सन्दर्भमा सत्य, तथ्य र निष्पक्ष समाचार सम्प्रेषण गरि निर्वाचन सफल बनाउन सहयोग गर्न जोड दिएकी छिन् ।
कार्यक्रममा सहायक प्रमुख जिल्ला अधिकारी एवम् निर्वाचन निर्वाचन आचारसंहिता अनुगमन अधिकारी दिपेन्द्र पौडेलले जिल्लामा मिडियामा आचारसंहिता विपरित कुनै पनि घटना नघटेको बताएका छन् ।
