सिन्धुली । प्रेस काउन्सिल नेपालले सिन्धुलीका सञ्चारमाध्यमको अनुगमन गरेको छ । बुधबार सिन्धुलीमाढीमा आएको काउन्सिलको आचारसंहिता अनुगमन टोलीले सिन्धुलीका सञ्चार माध्यम र सञ्चार गृहहरुको अनुगमन गरेको हो । नेपाल पत्रकार महासंघसँगको सहकार्यमा मिडिया अनुगमन गरिएको हो ।
काउन्सिलका सदस्य शान्तराम विडारी, अनुगमन अधिकृत प्रकाश अर्याल, नेपाल पत्रकार महासंघका महासचिव रामप्रसाद दाहाल, पत्रकार महासंघ बागमती प्रदेश उपाध्यक्ष बिमला पाण्डे सहितको टोलीले जिल्लाका सञ्चारमाध्यमको प्रकाशन, प्रसारणको अवस्था, पत्रपत्रिकाको वितरणको अवस्था, विषयवस्तु तथा आचारसंहिता पालनाको अनुगमन गरेको हो ।
काउन्सिलले मिडियामा निर्वाचन आचारसंहिताको अनुगमनको सुरुवात सिन्धुलीबाट गरेको हो । सातै प्रदेशमा अनुगमन तथा अन्तक्र्रिया कार्यक्रम गर्ने गरि काउन्सिलले विशेष अनुगमन सुरु गरेको काउन्सिलका सदस्य शान्तराम विडारीले बताएका छन् । अनुगमनका क्रममा सञ्चारमाध्यमहरुको भौतिक अवस्था, आर्थिक अवस्था, जनशक्तिको अवस्थाका बारेमा समेत जानकारी लिईएको छ ।
