सिन्धुली । खुर्कोटमा इलाका प्रशासन कार्यालय स्थापनाको माग गर्दै सिन्धुलीका तीन स्थानीय तहका अध्यक्षहरुले जिल्ला प्रशासन कार्यालय सिन्धुलीको ध्यानाकर्षण गराएका छन । सुनकोशी गढतिर क्षेत्रका तीन स्थानीय तहलाई मध्यनजर गरि खुर्कोटमा इलाका प्रशासन कार्यालयको स्थापनाको माग गर्दै शुक्रबार प्रमुख जिल्ला अधिकारी दिनेश सागर भुसालको ध्यानाकर्षण गराएका हुन ।
नेपाल सरकारले विकास गरिरहेको मध्यपहाडी लोकमार्गमा पर्ने दश नयाँ शहरमध्ये खुर्कोट तीन वटा स्थानीय तहको समेत मध्य भागमा रहेको जनाउँदै जिल्लाका सुनकोशी गाउँपालिका अध्यक्ष दिपा बोहोरा दाहाल, गोलञ्जोर गाउँपालिका अध्यक्ष शंकरराज बराल र फिक्कल गाउँपालिका अध्यक्ष पार्वती सुनुवारले ध्यानाकर्षण पत्र बुझाएका हुन ।
मध्यपहाडी लोकमार्ग र विपी राजमार्ग दुवै यसै स्थान हुँदै जाने भएकाले यातायात, विद्युत र इन्टरनेट जस्ता पूर्वाधारमा सहज पहुँच रहेको, इलाका प्रहरी कार्यालय स्थापना भईसकेको खुर्कोटमा तीन स्थानीय तह समेटि इलाका प्रशासन खोल्नुपर्ने तीनवटा स्थानीय तहहरुको माग रहेको छ ।
फिक्कल, गोलन्जोर र सुनकोशी गाउँपालिका समेट्दा इलाका प्रशासन स्थापना गर्न जनघनत्व पुग्ने र नागरिकहरूले नागरिकता लगायत प्रशासनिक सेवा लिन दिन नै माया मारी सिन्धुलीमाढी धाउनुपर्ने बाध्यता रहेको भन्दै खुर्कोटमा इलाका प्रशासन कार्यालय स्थापना गर्नुपर्ने माग गरिएको हो । खुर्कोटमा इलाका प्रशासन स्थापना हुँदा तीन वटै गाउँपालिकाका जनतालाई नजिकैबाट छिटो र सहज रूपमा सेवा प्राप्त हुने ध्यानाकर्षण पत्रमा जनाइएको छ ।
गोलन्जोर, सुनकोशी र फिक्कल गाउँपालिकाले जनताको सुविधालाई मध्यनजर गर्दा खुर्कोट नै उपर्युक्त स्थानका रूपमा अघि सारेको जनाएका छन ।
जिल्ला प्रशासन कार्यालय सिन्धुलीका प्रमुख जिल्ला अधिकारी भुसालले जिल्लाको भौगोलिक विकटतालाई ध्यानमा राख्दै जनघनत्वका आधारमा आवश्यक अध्ययन गरेर इलाका प्रशासन कार्यालय स्थापनाको प्रक्रिया अघि बढाउने प्रतिबद्धता जनाएका छन् ।
