सिन्धुली । विद्यालयमा भएको अनियमितता र भुक्तानीको विषयलाई लिएर प्रमुख प्रशासकीय अधिकृतले प्रगतिशिल माविका प्रधानाध्यापक सरिता चौलागाईलाई स्पष्टीकरण सोधेपछि सुनकोशी गाउँपालिकाका उपाध्यक्ष सहितका जनप्रतिनिधिले प्रमुख प्रशासकीय अधिकृत अर्जुन दर्जीको कार्यकक्ष र शिक्षा शाखामा तालाबन्दी गरेका छन ।
गाउँपालिकाका उपाध्यक्ष कपिल कोईराला, चार जना वडाअध्यक्ष र ३ जना कार्यपालिका सदस्यले तालाबन्दी गरेका हुन । विद्यालयको अनियमितताबारे अख्तियार दुरुपयोग अनुसन्धान आयोगले छानबिन गरिरहेको र उच्च अदालत पाटनले प्रधानाध्यापकमा रही कामकाज गर्ने आदेश दिएको भए पनि प्रमुख प्रशासकीय अधिकृत दर्जीले प्रअ चौलागाईंलाई बारम्बार पत्र काटेर स्पष्टिकरण सोधेको र दुःख दिएको भन्दै जनप्रतिनिधिहरुले दर्जीको कार्यकक्षमा तालाबन्दी गरेका हुन ।
गाउँपालिका उपाध्यक्ष कपिल कोइरालाले जनप्रतिनिधिहरु तथा गाउँसभालाई नै जानकारी नदिई बारम्बार पत्र पठाएर स्पष्टीकरण सोध्ने र राजीनामा माग्ने काम भएकाले स्पष्टिकरणपत्र फिर्ता नलिएसम्म तालाबन्दी गरिने बताए । कोइरालाले विद्यालयमा विद्यालय व्यवस्थापन समिति गठनमा पत्राचार गर्न र ८ महिनासम्म विद्यालयमा व्यवस्थापन गठन गर्न नसकेको बताउँदै गर्नुपर्ने काममा पत्राचार नगर्ने र नगर्नुपर्ने काममा पत्राचार गर्ने काम गरेको बताए । अख्तियारले छानविन गरिहेको विषयमा पत्र लेख्नु गलत भएको उनको दावी छ ।
पछिल्लो पटक प्रमुख प्रशासकीय अधिकृत अर्जुन दर्जीले गाउँपालिकाले उपलब्ध गराएको खर्चको विवरण, भवन निर्माण कम्पनीलाई गर्नुपर्ने भुक्तानी, अनुदानको दुरुपयोग, उच्च नैतिकता, लगायतका विषयलाई लिएर आइतबार प्रधानाध्यापक चौलागाईंलाई स्पष्टीकरण सोधेका थिए ।
प्रमुख प्रशासकीय अधिकृत दर्जीले विद्यालयको आर्थिक कारोबारमा कैफियत देखिएको र निर्माण कम्पनीलाई पुसमै भुक्तानी गर्नुपर्ने रकम हालसम्म भुक्तानी नदिई १६ लाखभन्दा बढी अपुग देखाइएको भन्दै स्पष्टीकरण सोधेका थिए । सोहि स्पष्टीकरणको विरोध स्वरुप नेपाली कांग्रेसबाट निर्वाचित जनप्रतिनिधिहरुले दर्जीको कार्यकक्षमा सोमबार ताला लगाएका थिए ।
सुनकोशी गाउँपालिकाका अध्यक्ष दीपा बोहोरा दाहालले भ्रष्टाचार गर्नेहरुको संरक्षण गर्नका लागि गाउँपालिकामा तालाबन्दी गरेको बताईन । उनले पालिकाको काम नरोकिने समेत बताईन ।
यसैबीच गाउँपालिकाका कर्मचारीहरुले कार्यालयको कामकाज नियमित रुपमा सञ्चालन गर्ने निर्णय गरेका छन । प्रमुख प्रशासकीय अधिकृत अर्जुन दर्जीको अध्यक्षतामा मंगलबार बसेको गाउँपालिकाका कर्मचारीहरुको बैठकले असारको समय भुक्तानी र कामको चाप बढी हुने भएकाले कामकाजलाई निरन्तर सञ्चालन गर्ने निर्णय गरेको छ ।
गाउँपालिकाका प्रमुख प्रशासकीय अधिकृत अर्जुन दर्जीले प्रधानाध्यापक चौलागाईंलाई नैतिकताका आधारमा पदबाट हट्न अनुरोध गरि पत्राचार गरेको भनेर कार्यकक्षमा ताला लगाएको बताए । उनले तालाबन्दी गर्ने जनप्रतिनिधिहरुसँग बसेर छलफल गर्न नपाएको पनि बताए । गाउँपालिकाको सेवा सञ्चालनको काम कर्मचारीहरुले नरोक्ने पनि उनले जानकारी दिए ।
