सिन्धुली । जिल्लाको फिक्कल गाउँपालिकाले एसईईमा उत्कृष्ट रिजल्ट ल्याउन सफल भएको छ । फिक्कल गाउँपालिकाको शिक्षा शाखाले एसईई २०८१ को पालिकास्तरीय नतिजा सार्वजनिक गर्दै पालिकाभित्रका ९५.६० प्रतिशत विद्यार्थी उत्तिर्ण भएको जनाएको छ ।
पालिकाले सार्वजनिक गरेको तथ्यांक अनुसार पालिका भित्रका १३ वटा सामुदायिक विद्यालयका ३४१ विद्यार्थी परीक्षामा सहभागि भएका थिए । ती मध्ये ३२६ जनाले एसईई उत्तिर्ण गरेका छन । यस्तै १५ जनाले ग्रेड प्राप्त गर्न सकेका छैनन ।
मावि सुम्नामसुन्तले चण्डी भञ्ज्याङका तीन जना विद्यार्थीले पालिकाको उत्कृष्ट नजिता प्राप्त गरेका छन । उक्त विद्यालयका शतप्रतिशत विद्यार्थी पास भएका छन । विद्यालयका भिमकुमारी राना, मिलन थापा मगर र चित्र बहादुर सुनुवारले ३.६० जिपिए प्राप्त गरि पालिकाभरीकै उत्कृष्ट विद्यार्थी समेत बनेका छन ।
पालिकाका ७ वटा सामुदायिक विद्यालयले शत प्रतिशत विद्यार्थी पास गराउन सफल भएका छन । मावि महादेवडाँडा, मावि सुम्नामसुन्तले चण्डीभञ्ज्याङ, मावि रातमाटा खोलागाउँ, महाकाली मावि पोटी खाङसाङ, सुनकोशी मावि खाङसाङ, फिक्कल मावि सोल्पा र रत्नगंगा मावि सोखुडिहिटारले शत प्रतिशत विद्यार्थी पास गराउन सफल भएका हुन । फिक्कल गाउँपालिकामा नीजि विद्यालयहरु छैनन ।
