सिन्धुली । अपांगता भएका व्यक्ति र उनका परिवारलाई लक्षित गरि शनिबारदेखि सिन्धुलीमाढीमा ट्याकसुट तथा झोला बनाउने तालिम सुरु भएको छ । सामाजिक विकास कार्यालय हेटौडा तथा सिन्धुली अपांग संघको आयोजनामा १५ दिने तालिम सुरु भएको हो । तालिमको उद्घाटन कमलामाई नगरपालिका वडा नं. ६ का वडाअध्यक्ष उज्जल थापाले गरेका छन ।
अपांगता भएका व्यक्तिहरुको सशक्तिकरण कार्यक्रम अन्तर्गत सुरु भएको तालिमको उद्घाटनमा बोल्दै वडाअध्यक्ष थापाले सिकेको सिपलाई व्यवहारमा ल्याई स्वरोजगार बन्न आग्रह गरे । उनले स्वरोजगारतर्फ सिप सिक्नेहरुले ध्यान नदिनेका गरेको बताउँदै सिप सिक्नेले सिपको सदुपयोग गरे आत्मनिर्भर बनेमा मात्र तालिमको सार्थकता हुने बताए ।
कार्यक्रममा बोल्दै नेपाल पत्रकार महासंघ बागमती प्रदेशका उपाध्यक्ष बिमला पाण्डेले सिप हुने र श्रम क्षेत्रमा निरन्तर लाग्ने व्यक्ति सफल हुने विश्वास व्यक्त गरिन । उनले सिप र श्रमलाई स्वरोजगारमा जोड्न आग्रह गरिन ।
कार्यक्रममा बोल्दै नवज्योति बहिरा स्कुलका संस्थापक तथा सल्लाहकार नारायण बरालले अपांगता भएका व्यक्तिलाई आयआर्जनसँग जोड्न सिप उपयुक्त रहेको बताउँदै सिपको सदुपयोग गर्न सहभागिलाई आग्रह गरे ।
सिन्धुली अपांग संघका अध्यक्ष वविता थापाको अध्यक्षतामा सम्पन्न उद्घाटन कार्यक्रमको सहजीकरण गर्दै नवज्योति बहिरा स्कुलका प्रिन्सिपल विजय लामाले तालिमको महत्व र उद्देश्यका बारेमा प्रस्ट गरेका थिए । तालिममा २० जनाको सहभागिता रहने छ । १५ दिनसम्म चल्ने तालिममा शोभा थापा मगर र गोपाल श्रेष्ठले प्रशिक्षण दिने छन ।
