सिन्धुली । विद्यालय शिक्षा ऐन जारी गर्न माग राख्दै काठमाडौं केन्द्रित सडक आन्दोलन गरेको नेपाल शिक्षक महासंघले सोमबारदेखि शैक्षिक हड्तालको घोषणा गरेको छ ।
हिउँदे अधिवेशन अन्त्य भएपछि शिक्षक महासंघले शिक्षा ऐन जारी गर्न तीन विकल्प अघि सारेको छ । विशेष वा बर्खे अधिवेशन डाकेर वा अध्यादेशबाट विद्यालय शिक्षा ऐन ल्याउनुपर्ने माग महासंघले अघि सारेको छ ।
सरकारले आफ्ना मागमा बेवास्ता गरेपछि चैत २० देखि जारी आन्दोलनलाई सशक्त बनाउन भन्दै सोमबारबाट शैक्षिक हड्तालको घोषणा गरिएको महासंघका अध्यक्ष लक्ष्मीकिशोर सुवेदीले जानकारी दिएका छन ।
अध्यक्ष सुवेदी र महासचिव तुलबहादुर थापाले विज्ञप्ति जारी गरेर देशभरका सबै विद्यालय बन्द गरी शिक्षक–कर्मचारीलाई काठमाडौंको शैक्षिक सडक आन्दोलनमा अनिवार्य सहभागी हुन आग्रह गरेका छन् ।
चालु शैक्षिक सत्र अन्त्य र वैशाखदेखि सुरु हुने शैक्षिक सत्रको थालनी गर्ने बेला महासंघले उत्तरपुस्तिका परीक्षण, नतिजा प्रकाशन, तालिम, गोष्ठी, सेमिनार, शैक्षिक भ्रमण जस्ता कुनै पनि काममा संलग्न नहुन शिक्षकहरूलाई अपिल गरेको छ । सरकारले वार्ता, संवाद र छलफलको आह्वान गर्दा पनि महासंघले अस्वीकार गर्दै आएको छ ।
यसैबीच सिन्धुलीका शिक्षक सरोकारवालाले पनि विज्ञप्ती मार्फत जिल्लाका सबै शैक्षिक गतिविधिमा संलग्न नहुन र आन्दोलनमा अनिवार्य सहभागिता जनाउन जिल्लाका शिक्षक कर्मचारीलाई आह्वान गरेका छन । अति अशक्तता बाहेक सबैलाई आन्दोलनमा सरिक हुन आग्रह गरिएको हो ।
नेपाल शिक्षक महासंघ सिन्धुली, नेपाल राष्ट्रिय शिक्षक संगठन सिन्धुली, नेपाल शिक्षक संघ सिन्धुली र प्रगतिशिल नेपाल राष्ट्रिय शिक्षक संगठन, एकीकृत अखिल नेपाल शिक्षक संगठन सिन्धुलीले संयुक्त विज्ञप्ती जारी गर्दै सबै शिक्षकलाई आन्दोलनमा अनिवार्य सहभागिता जनाउन आग्रह गरेको छ ।
यस्तै विद्यालय व्यवस्थापन समिति, शिक्षक अविभावक संघ, विद्यार्थीहरु, अविभावक र शिक्षासँग सरोकार राख्ने सबैलाई आन्दोलनमा सहयोग गर्न समेत आह्वान गरेका छन ।
सरकारले २०७५, २०७९ र २०८० मा शिक्षक महासंघसँग सहमति गरेको थियो । शैक्षिक हड्तालले ३४ हजार विद्यालयका ७० लाख बालबालिकाको शैक्षिक गतिविधि प्रभावित हुनुका साथै एसईईमा सहभागी ५ लाख विद्यार्थीको उत्तरपुस्तिका परीक्षणमा समेत ढिलाइ हुने भएको छ ।
