सिन्धुली । जिल्लामा आयुर्वेद स्वास्थ्य सेवा तर्फ आकर्षण बढीरहेको छ । आयुर्वेद तथा वैकल्पिक चिकित्सालय सिन्धुलीका अनुसार तीन वर्षमा क्रमशः सेवा लिनेको संख्यामा वृद्धि भएको छ ।
कार्यालयको तथ्यांक अनुसार आर्थिक वर्ष २०७९/८० देखि चालु आर्थिक वर्षको माघ मसान्तसम्म ४६ हजार १ सय ९५ जनाले आयुर्वेद सेवा लिएका छन ।
कार्यालयका निमित्त कार्यालय प्रमुख दिपकराज तिमल्सिनाले आर्थिक वर्ष २०७९/८० मा १० हजार ९ सय ५० जना, आर्थिक वर्ष २०८०/८१ मा २० हजार १ सय ५० जना र चालु आर्थिक वर्षमा १५ हजार ९५ जनाले आयुर्वेद सेवा लिएको जानकारी दिएका छन ।
उनले हरेक वर्ष नागरिकहरुको आयुर्वेद स्वास्थ्य सेवामा आकर्षण बढ्न थालेको बताए । कार्यालयले ४ वटा नागरिक आरोग्य केन्द्र, ५ वटा औषधालय र आयुर्वेद तथा वैकल्पिक चिकित्सालय सहित १० स्थानबाट सेवा दिईरहेको छ । गोलञ्जोर गाउँपालिका बाहेक ९ वटा स्थानीय तहबाट सेवा प्रवाह गरिरहेको तिमल्सिनाले बताए ।
आयुर्वेद तथा वैकल्पिक चिकित्सालय सिन्धुलीले १० वटा स्वास्थ्य सेवा निःशुल्क गरेको छ । कार्यालयले निःशुल्क फिजियोथेरापी सेवा, निःशुल्क योग सेवा, निःशुल्क स्वस्थ जीवन प्रवद्र्धन कार्यक्रम, निःशुल्क औषधी वितरण सेवा, निःशुल्क स्तनपायी आमालाई मातृशिशु सुरक्षार्थ सेवा, दुग्धवर्धक आयुर्वेद औषधि वितरण तथा प्रवद्र्धन कार्यक्रम, निःशुल्क जेष्ठ नागरिकका स्वास्थ्य प्रवद्र्धन सेवा कार्यक्रम, निःशुल्क मुख्यमन्त्री जनता स्वास्थ्य कार्यक्रम (हरेक बुधवार), निःशुल्क पथ्य आहार कार्यक्रम, निःशुल्क जानुसन्धीगत वात लगायतका सेवाहरु दिईरहेको छ ।
यस्तै अकुपञ्चर सेवा, ल्याव सेवा, भिडियो एक्सरे सेवा, जलौका अवचरण सेवा, अग्निकर्म सेवा, वस्तिकर्म सेवा, क्षारशुत्र सेवा, बहिरंग सेवा, पञ्चकर्म (पूर्वकर्म सेवा), फार्मेसी सेवा लगाएतका सेवाहरु सञ्चालन गरेको छ ।
तिमल्सिनाका अनुसार प्रचारप्रसार र सेवा वृद्धिका कारण सेवाग्राहीमा आयुर्वेद सेवातर्फ विश्वास बढ्दै गएको छ । यस्तै पछिल्लो समय योग सेवा, पञ्चकर्म (पूर्वकर्म) सेवा, अक्कुपञ्चर सेवा लिनेको संख्या अत्यधिक बढेको छ ।
