सिन्धुली । जिल्लामा रहेका ट्राफिक प्रहरी तथा नेपाल प्रहरीलाई प्रदुषणबाट उत्पन्न स्वास्थ्य समस्या न्युनिकरण सम्बन्धि तालिम दिन सुरु गरिएको छ ।
जिल्ला प्रहरी कार्यालय सिन्धुलीको समन्वय तथा आयुर्वेद तथा वैकल्पिक चिकित्सालय सिन्धुलीको आयोजनामा शनिबारबाट सुरु भएको तालिम तीन दिन चल्ने छ । तालिमको उद्घाटन प्रमुख जिल्ला अधिकारी लिला प्रसाद शर्माले गरेका छन ।
तालिममा सहभागीहरूलाई नश्यकर्म, जलनेती, सूत्र नेती, योग अभ्यास गराउनुका साथै सो सम्बन्धि सैद्धान्तिक कक्षा सञ्चालन गरिने आयुर्वेद तथा वैकल्पिक चिकित्सालय सिन्धुलीका निमित्त कार्यालय प्रमुख दीपकराज तिमल्सिनाले बताए ।
नसर्ने रोग र जीवन शैलीबारे जानकारी, योग र ध्यान एवम् व्यायामको अन्तर र जीवनमा व्यायामको महत्व, नश्य जलनेती क्रिया, प्रणायाम र वायु प्रदूषणजन्य रोगमा आयुर्वेदको भूमिकाका विषयमा तालिममा जानकारी गराईने उनले बताए ।
तालिममा ३५ जना प्रहरी कर्मचारीहरुको सहभागिता रहेको जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले जानकारी दिए । तालिममा आयुर्वेद तथा वैकल्पिक चिकित्सालय सिन्धुलीका स्वास्थ्यकर्मीहरुले सहजीकरण गरेका छन ।
