अविरल वर्षाका कारण मध्यपहाडी राजमार्गमा पहिरो नै पहिरो गएको छ । राजमार्गको खुर्कोट–घुर्मी सडक खण्डको विभिन्न ठाउँमा गएको पहिरोले मध्यपहाडी राजमार्ग तीन दिनदेखि अवरुद्ध भएको छ ।
निरन्तरको वर्षापछि दर्जनौं स्थानमा पहिरो खस्दा सडक सञ्चालनमा ल्याउन समेत कठिन हुने देखिएको फिक्कलका स्थानीय नवराज पहाडीले बताए । यता सबैभन्दा बढी गोलञ्जोरका विभिन्न ठाउँमा सडकमा पहिरो गएको छ । उनका अनुसार मध्यपहाडी राजमार्गमा पैदल यात्रा गर्न समेत समस्या भएको छ ।
ओखलढुङ्गा, सोलुखुम्बु, खोटाङ, भोजपुर र उदयपुरको राजधानी काठमाडौँसँग जोडिने मुख्य मार्गको रूपमा रहेको मध्यपहाडी राजमार्गको खुर्कोट–घुर्मी सडक खण्ड पूर्ण रूपमा अवरुद्ध भएपछि पूर्वी पहाडी जिल्लाबाट आवात जावतमा समस्या भएको छ ।
मध्यपहाडी राजमार्ग अवरुद्ध हुँदा सिन्धुलीका दुई स्थानीय तहका नागरिकलाई समेत सदरमुकाम तथा काठमान्डौ र पूर्वी पहाडी जिल्लामा आवत जावत गर्न कठिनाई भएको पहाडीले बताए । फिक्कल गाउँपालिकाको नवलपुर, निगुरेखोला लगाएत विभिन्न स्थानमा पहिरो खस्दा राजमार्ग अवरुद्ध भएको छ ।
मध्यपहाडी राजमार्गमा गोलन्जोर गाउँपालिकाको हैबार, अक्करेभिर, बलेनी, कुखुरेटार, कालीआँप, कुँडुले, मुर्कीबेसी लगायत ठाउँमा पहिरो खसेको गोलञ्जोर गाउँपालिकाका उपाध्यक्ष ज्वाला प्रसाद न्यौपानेले बताए ।
उनका अनुसार हैवारमा सुनकोशीको बाढीले एकसय मिटर सडक नै झारेर सडक सञ्जाल नै टुटाईदिएको न्यौपानेले बताए ।
मध्यपहाडी राजमार्गको सिन्धुली खण्ड खुलाउनका लागि सोमबारबाट काम सुर गर्ने तयारी गरिएको जिल्ला प्रहरी कार्यालय सिन्धुलीका प्रमुख एसपी गोविन्दराज काफ्लेले बताए । उनले सडक भासिएको ठाउँमा नयाँ ट्रयाक खोलेर भए पनि यातायात सञ्चालन हुने गरि सडक सञ्चालनका लागि काम गरिने बताए ।
मध्यपहाडी राजमार्ग र विपी राजमार्ग अवरुद्ध भएपछि सिन्धुली सहित पूर्वी नेपालसँग काठमान्डौको सम्पर्क टुटेको छ ।
