सिन्धुली । कृष्ण जन्माष्टमीको अवसरमा सिन्धुलीका नेवार समुदायले सदरमुकाम सिन्धुलीमाढीमा लाखेजात्रा तथा विभिन्न सांस्कृतिक कार्यक्रमको आयोजना गरेका छन ।
श्री गणेश भिमसेन मन्दिर व्यवस्थापन समितिको आयोजना तथा नेवाः देय दवु, नेवाःमिसा दवु, नेवाःल्याय्म्ह दव, खल पुचःहरु लगाएतका संस्थाहरुको सहकार्यमा लाखे जात्रा मनाईएको हो ।
सिन्धुलीमाढीको दुई नम्बर बजारबाट नेवारी बाजागाजा, झाँकी तथा विभिन्न सांस्कृतिक कार्यक्रम सहित सुरु भएको लाखेजात्रा तथा सांस्कृतिक कार्यक्रम २ नम्बर बजार, गैह्रि बजार, १ नम्बर बजार, स्टलबजार, बसपार्क, धुरा बजार हुँदै ढुंग्रेबासमा रहेको कृष्ण मन्दिरमा पुगेर सम्पन्न भएको छ ।
राधा, कृष्ण र लाखे सहित सुरु भएको जात्रामा लाखे नाच, लठ्ठी नाच, धिमेबाजा, रोपाईं नाच, नेवारी नृत्यहरु लगाएतका सांस्कृतिक कार्यक्रम प्रस्तुत गरिएको थियो ।
नेवारी संस्कृतिको संरक्षण लागि सिन्धुलीका नेवार समुदायले प्रत्येक वर्ष गाईजात्रा र कृष्ण जन्माष्टमीको अवसरमा गाईजात्रा, लाखे नाच देखाउने गरिएको छ ।
