सिन्धुली । जिल्लाका स्थानीय तहले अब्बल आफ्नै मुल्यांकनमा आफ्नै नतिजा प्रभावकारी निकाल्न सकेका छैनन । जिल्लाका नौ स्थानीय तहमध्ये कुनै पनि स्थानीय तहले ९० प्रतिशत नतिजा समेत दिन सकेका छैनन ।
स्थानीय तह संस्थागत क्षमता स्वमुल्यांकन २०७९/८० को नतिजा अनुसार जिल्लाका स्थानीय तहले सर्वोत्कृष्ट नतिजा निकाल्न सकेका छैनन । तथापी केहि स्थानीय तहको नतिजा भने उत्कृष्ट नै देखिएको छ ।
मरिण पहिलो गोलञ्जोर अन्तिम विन्दुमा
विहिबार सार्वजनिक गरिएको स्थानीय तह संस्थागत क्षमता स्वमुल्यांकन २०७९/८० मा जिल्लाका नौ स्थानीय तहमध्ये मरिण गाउँपालिका पहिलो भएको छ । मरिण गाउँपालिका ८५ दशमलब ५० अंक सहित जिल्लाको उत्कृष्ट स्थानीय तह बनेको हो ।
स्थानीय तह संस्थागत क्षमता स्वमुल्यांकन २०७८/७९ मा स्थानीय तह संस्थागत क्षमता स्वमूल्याङ्कनमा ९४.७५ अंक प्राप्त गरि मरिण गाउँपालिका देशकै सर्वोउत्कृष्ट गाउँपालिका भई शनिबार ग्यालेक्सी एक्सीलेन्सि अवार्ड समेत प्राप्त गरेको पालिका हो । यस्तै दुधौली नगरपालिकाले ८२ दशमलब ७५ अंक सहित दोस्रो स्थान प्राप्त गरेको छ ।
जिल्लाको गोलञ्जोर गाउँपालिका स्थानीय तह संस्थागत क्षमता स्वमुल्यांकनमा अन्तिम स्थानमा रहेको छ । गोलञ्जोर गाउँपालिकाले ५३ दशमलब २५ अंक सहित अन्तिम स्थानमा रहेको छ ।
यस्तै घ्याङलेख गाउँपालिका ७८ अंकका साथ तेस्रो स्थानमा रहेको छ । सुनकोशी गाउँपालिकाले ६७ दशमलब ७५ अंक सहित जिल्लामा स्थानीय तह संस्थागत क्षमता स्वमुल्यांकनमा चौथो स्थानमा रहेको छ । कमलामाई नगरपालिका र हरिहरपुरगढी गाउँपालिकाको स्कोर बराबर छ । दुवै पालिकाले ६१ दशमलव ५० अंक प्राप्त गरेका छन । यस्तै फिक्कल गाउँपालिकाले ६० दशमलब २५ अंक र तीनपाटन गाउँपालिकाले ५६ अंक प्राप्त गरेका छन ।
स्थानीय तह संस्थागत क्षमता स्वमुल्यांकनमा दशवटा सूचकमा एक सय प्रश्नहरु रहेका हुन्छन । ती सूचकलाई स्थानीय तहले आफै नम्बर दिन पाउँछन । ती सूचकमध्ये शासकीय प्रबन्ध, संगठन र प्रशासन, वार्षिक बजेट तथा योजना तर्जुमा व्यवस्थापन, वित्तिय तथा आर्थिक व्यवस्थापन, सेवा प्रवाह, न्यायीक सम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद व्यवस्थापन र सहकार्य र समन्वयका सूचकहरु रहेका छन ।
जिल्लाका स्थानीय तहको समन्वय र सहकार्य, न्याय सम्पादन, सेवा प्रवाह,सामाजिक समावेशीकरणका सूचकमा कमजोर अंक रहेको पाईएको छ ।
