सिन्धुली । कमलामाई नगरपालिका वडा नंं ४ ढकालगाउँकी सारदा थापालाई ऋण नतिरेको भन्दै स्थानीयले बन्धक बनाई कुटपिट गरेका छन । उनीहरुले तीनदिनदेखि घरकै पिढीको खाँबो र विजुलीको पोलमा बाँधेर कुटपिट गरेका हुन ।
आइतबार विजुलीको पोलमा बाँधेर कुटपिट गरेको अवस्थामा जिल्ला प्रहरी कार्यालय सिन्धुलीका प्रमुख एसपीले सारदाको उद्धार गरेका छन । उद्धारपछि उनलाई सिन्धुली अस्पतालमा उपचार गरि सेफ हाउसमा राखिएको छ । उनको शरीरभरी निलडाम छ । सारदाको स्वास्थ्य जोखिमपूर्ण रहेको चिकित्सकले भनेको प्रहरीले जनाएको छ ।
जिल्ला प्रहरी कार्यालय सिन्धुलीका एसपी राजकुमार सिलवालका अनुसार महिलालाई बन्धक बनाएर कुटपिट गरेको आरोपमा ७ जना पक्राउ परेका छन । केहि फरार छन । सारदालाई शुक्रबारदेखि केहि खान नदिई आईतबारसम्म घरमै बाँधेर कुटपिट गरेको पीडित सारदा थापाले बताएकी छिन ।
एसपी सिलवालले आइतबार ४ बजे पीडितको उद्धार गरेका थिए । उनलाई बेहोस अवस्थामा पोलमा बाँधेको, लडिरहेको र होस गुमेको अवस्थामा एसपी सिलवाले आफ्नै गाडीमा उद्धार गरि अस्पताल पु¥याएका थिए । उनको टाउकोमा चोट लागेको हुन सक्ने चिकित्सकले बताएका छन । चिकित्सकले एमआरआई गर्न सुझाव समेत दिएका छन ।
घटनामा संलग्न रहेको आरोपमा प्रहरीले स्थानीय इश्वरकुमार पोखरेल, मिलन देवकोटा, निकेश ढकाल, लक्ष्मी पोखरेल, विष्णु ढकाल, पीडितका श्रीमान सन्तोष थापा र एकबहादुर खड्कालाई पक्राउ गरेको छ ।
ईश्वरकुमार, मिलन, निकेश र लक्ष्मीविरुद्ध पीडितले किटानी जाहेरी नै दिएकी थिइन । आफुलाई बाँधेर मुक्का, लात्ती र लौरोले कुटपिट गरेको शारदाले प्रहरीलाई भनेकी छिन ।
पीडितले प्रहरीलाई दिएको बयान, स्थानीयको भनाइ र प्रहरी अनुसन्धान अनुसार कुटपिटको घटना शुक्रबारदेखि सुरु भएको थियो । शुक्रबार श्रीमान वेपत्ता भएका थिए । सारदाले श्रीमान हराएपछि श्रीमान खोजी पाउँ भनि जिल्ला प्रहरी कार्यालय सिन्धुलीमा उजुरी पनि दिएकी थिईन । सन्तोषलाई शनिबार प्रहरीले खोजी गरेर घर पठाएको थियो ।
सन्तोष घरमा पुगेपछि शनिबार राती सन्तोषलाई पनि सारदासँगै एकैठाउँ बाँधेर कुटेका थिए । पछि सन्तोषलाई छोडिदिएका थिए । तर सारदालाई भने निरन्तर तीनदिनसम्म बाँधेर कुटिरहे । ऋण लिएर काठमान्डौमा जग्गा जोडेको र ऋण तिर्नुपर्छ भनि श्रीमानसँग डिभोर्स गर्न खोजेको पीडक पक्षको आरोप छ ।
आइतबार सारदा सन्तोषसँग अदालत आएकी थिईन । अदालतमा डिभोर्स मुद्दाको सुनुवाई भएकाले उनलाई पीडक पक्षले नै अदालत ल्याईदिएका थिए । अदालतबाट सारदा घर फर्कन मानेकी थिईनन । तर पीडकहरुले नै उनलाई गाडीमा लगेका थिए । घर लगेपछि उनलाई विजुलीको पोलमा बाँधेर कुटेर बेहोस बनाएका थिए । स्थानीयले कुटपिट गरेको खबर एसपीलाई गराएपछि बेहोस अवस्थामा उनको उद्धार भएको थियो ।
के हो लेनदेनको विषय ?
एसपी सिलवालका अनुसार शारदाका श्रीमान् सन्तोषले आफूहरूले स्थानीयसँग एक करोड २५ लाख ऋण लिएको बयान दिएका छन । बयान अनुसार थापा दम्पतीले काठमाडौंमा जग्गा किन्ने क्रममा उक्त ऋण लिएका थिए । तर, उनीहरूले ऋण तिर्न सकेका थिएनन । यसै क्रममा सन्तोष र शारदा भने सम्बन्ध विच्छेदको प्रक्रियामा थिए । सारदाले जग्गा बेच्न मानेकी थिईनन । यस विषयमा अनुसन्धान भईरहेको एसपी सिलवालले बताए । लेनदेनको विषय जे भए पनि पीडक पक्षले अमानवीय र अपराधिक कार्य गरेको एपी सिलवालले बताए ।
